ប្រធាន​ប្រព័ន្ធ​យុត្តិធម៌​អ៊ីរ៉ង់ លោក Mohseni Ejei ត្រូវ​តែង​ឲ្យ​ដឹកនាំ​មួយអាណត្តិ៥​ឆ្នាំ​​ទៀត

មេដឹកនាំកំពូលនៃសាធារណរដ្ឋឥស្លាមអ៊ីរ៉ង់ លោក Mojtaba Khamenei បានតែងតាំងលោក Hojjatoleslam​ Gholamhossein Mohseni Ejei ឲ្យ​បន្ត​​ដឹកនាំ​ប្រព័ន្ធ​​យុត្តិធម៌ក្នុងប្រទេសអ៊ីរ៉ង់ សម្រាប់​មួយ​អាណត្តិ​ដែល​មានរយៈពេល​៥ឆ្នាំ​ទៀត។ ស្ថាប័ន​យុត្តិធម៌​គឺជាអំណាចមួយក្នុងចំណោមអំណាចរដ្ឋធំៗទាំងបីក្នុងប្រទេស ហើយទទួលខុសត្រូវលើការត្រួតពិនិត្យប្រព័ន្ធតុលាការ និងការគ្រប់គ្រងរដ្ឋបាលយុត្តិធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីសារព័ត៌មាន wanaen, ការតែងតាំងនេះត្រូវបានធ្វើឡើងស្របតាមមាត្រា ១៥៧ នៃរដ្ឋធម្មនុញ្ញនៃសាធារណរដ្ឋឥស្លាមអ៊ីរ៉ង់ ដែលផ្តល់អំណាចដល់មេដឹកនាំកំពូល ក្នុងការតែងតាំងប្រមុខនៃស្ថាប័នតុលាការ។

នៅក្នុងក្រឹត្យរបស់លោក Mojtaba បានលើកសរសើរចំពោះ «កិច្ចខិតខំប្រឹងប្រែងដ៏មានតម្លៃ និងស្មោះត្រង់» របស់លោក Mohseni Ejei ក្នុងអំឡុងពេលអាណត្តិកន្លងមករបស់លោក ហើយបានអំពាវនាវឲ្យមានការបន្តការកែទម្រង់នៅក្នុងប្រព័ន្ធតុលាការរបស់អ៊ីរ៉ង់។

លោកគូសបញ្ចាក់ដែរថា ការណែនាំ​ដែលបន្សល់ទុកដោយអតីតមេដឹកនាំអ៊ីរ៉ង់ រួមជាមួយនឹងគោលការណ៍នានាដែលបានចែងនៅក្នុងសារផ្ទាល់ខ្លួនរបស់លោក ដែលបានចេញផ្សាយនៅថ្ងៃទី៧ ខែកក្កដា ឆ្នាំ២០២៦ គួរតែដើរតួជាផែនទីបង្ហាញផ្លូវសម្រាប់ការផ្លាស់ប្តូរបន្ថែមទៀត និងការអភិវឌ្ឍអ្វីដែលលោកបានពិពណ៌នាថាជា «ស្ថាប័នតុលាការដ៏គួរឲ្យចង់បាន»។

មេដឹកនាំកំពូលរូបនេះ ក៏បានបង្ហាញក្តីសង្ឃឹមផងដែរថា តាមរយៈការខិតខំប្រឹងប្រែងជាថ្មីរបស់ប្រមុខតុលាការ ចៅក្រម និងបុគ្គលិកតុលាការ ប្រព័ន្ធតុលាការរបស់ប្រទេសអ៊ីរ៉ង់នឹងបន្តកែលម្អ និងផ្តល់ផលប្រយោជន៍កាន់តែច្រើនដល់ប្រជាជនអ៊ីរ៉ង់។

សូមបញ្ជាក់ថា លោក Mohseni Ejei បានកាន់តំណែងជាប្រមុខប្រព័ន្ធតុលាការក្នុងប្រទេសអ៊ីរ៉ង់ដំបូងបង្អស់ នៅក្នុងខែកក្កដា ឆ្នាំ២០២១ ។ យ៉ាងណា ការតែងតាំងលោកសារជាថ្មីនេះ បង្ហាញពីបំណងរបស់ថ្នាក់ដឹកនាំអ៊ីរ៉ង់ ដើម្បីរក្សាការបន្តវេនក្នុងការគ្រប់គ្រង និងរបៀបវារៈកែទម្រង់នៃស្ថាប័នរដ្ឋដ៏មានឥទ្ធិពលបំផុតមួយនៃប្រទេស៕

អត្ថបទ ៖ សាង ស្រីល័ក្ខ

មេបញ្ជាការ IRGC៖ ក្តីសុបិនសត្រូវ ដែលចង់ឲ្យអ៊ីរ៉ង់ចុះចាញ់ នឹងត្រូវរលាយសាបសូន្យ