ព័ត៌មានអន្ដរជាតិ

ណេតាន់យ៉ាហ៊ូ ឌឺដងឱ្យ JD Vance ថា ក្រៅពីអាមេរិក អ៊ីស្រាអែលនៅមានមហាមិត្តឥណ្ឌា ចាំជួយពេញទំហឹង!

បានផុស

៣០ វិនាទី មុន

នៅ

ថ្ងៃចន្ទ ៦ កក្កដា ២០២៦

ដោយ

Chheang

គ្រាន់តែឮអនុប្រធានាធិបតីអាមេរិក លោក JD Vance បាននិយាយថា អាមេរិក គឺជាសម្ព័ន្ធមិត្តដ៏មានអំណាចតែមួយគត់ ដែលនៅសេសសល់លើលោក ដើម្បីការពារអ៊ីស្រាអែល លោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានបកវិញភ្លាមៗថា ទោះអត់ពីក្រុងវ៉ាស៊ីនតោន ប្រទេសរបស់លោក នៅមានមហាមិត្តឥណ្ឌាមួយទៀត ដែលនៅចាំជួយជ្រោមជ្រែងជានិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីចុងសប្ដាហ៍មុន លោក JD Vance បានរំលឹកប្រាប់លោក ណេតាន់យ៉ាហ៊ូ ថា អាវុធដែលអ៊ីស្រាអែល កំពុងប្រើប្រាស់ការពារខ្លួន ក្នុងសង្រ្គាមរយៈពេលបីខែចុងក្រោយនេះ គឺសុទ្ធតែជារបស់ផលិតនៅអាមេរិក និងទិញដោយលុយពន្ធរបស់ប្រជាជនអាមេរិកាំងទាំងអស់។

ជាការឆ្លើយតប លោក ណេាតាន់យ៉ាហ៊ូ បានឆក់យកឱកាសនៅក្នុងកិច្ចសម្ភាសន៍ជាមួយទូរទស្សន៍ Fox News ដែលចាក់ផ្សាយកាលពីថ្ងៃអាទិត្យ ទី៥ ខែកក្កដា ឆ្នាំ២០២៦ ដោយនិយាយបែបចំអកបន្តិចទៅកាន់ភាគីអាមេរិកវិញថា អ៊ីស្រាអែលនៅមានមិត្តភក្តិល្អៗផ្សេងទៀត តួយ៉ាង ដូចជា ប្រទេសតូចមួយហៅថា «ឥណ្ឌា» ដែលមានប្រជាជនរហូតដល់ទៅ ១,៤ពាន់លាននាក់ ហើយប្រទេសមួយនេះ បានផ្តល់ការគាំទ្រដល់អ៊ីស្រាអែលយ៉ាងពេញទំហឹង។ លោកថែមទាំងបានរៀបរាប់បែបលេងសើចទៀតថា សូម្បីតែនៅលើបណ្តាញសង្គមហ្វេសប៊ុករបស់លោក ក៏មានប្រជាជនឥណ្ឌាចូលមកគាំទ្រ និងលើកទឹកចិត្តលោកយ៉ាងច្រើនលើសលប់ដែរ។

បើតាមសារព័ត៌មានឥណ្ឌា Hindustan Timesទំនាក់ទំនងរវាងឥណ្ឌា និងអ៊ីស្រាអែល គឺពិតជាល្អូកល្អិនខ្លាំងណាស់ ជាពិសេសរវាងលោក ណេតាន់យ៉ាហ៊ូ និងនាយករដ្ឋមន្ត្រីឥណ្ឌា លោក Narendra Modi ដែលរាប់អានគ្នាដូចជាមិត្តភក្តិបង្កើតអ៊ីចឹង។ កាលពីខែកុម្ភៈកន្លងទៅ លោក Modi ថែមទាំងបានធ្វើដំណើរទៅបំពេញទស្សនកិច្ចផ្លូវរដ្ឋនៅអ៊ីស្រាអែល ហើយបានប្រកាសច្បាស់ៗថា ឥណ្ឌា នឹងឈរក្បែរអ៊ីស្រាអែលជានិច្ច ដោយគ្មានការរារែកឡើយ។ ការប្រកាសនេះ បានធ្វើឡើងតែពីរថ្ងៃប៉ុណ្ណោះ មុនពេលដែលអ៊ីស្រាអែល និងអាមេរិកបានចាប់ដៃគ្នាបើកការវាយប្រហារភ្លាមៗទៅលើប្រទេសអ៊ីរ៉ង់ រហូតផ្ទុះទៅជាសង្រ្គាមពេញទំហឹង។

លោក ណេតាន់យ៉ាហ៊ូ និងលោក Modi (រូបថត៖ PTI)

សូមជម្រាបថា ជម្លោះពាក្យសម្តីរវាងភាគីអាមេរិក និងអ៊ីស្រាអែលពេលនេះ បានស្តែងឱ្យឃើញពីភាពរកាំរកូសកាន់តែខ្លាំងរវាងលោក ណេតាន់យ៉ាហ៊ូ និងប្រធានាធិបតីអាមេរិក លោក ដូណាល់ ត្រាំ។ ជម្លោះនេះ បានកើតឡើងដោយសារតែលោក ត្រាំ ចង់ចរចាបញ្ចប់សង្រ្គាមជាមួយអ៊ីរ៉ង់ ប៉ុន្តែខាងរដ្ឋាភិបាលអ៊ីស្រាអែល បែរជាមិនព្រម ហើយថែមទាំងបន្តវាយប្រហារទៅលើក្រុមហេសបូឡា នៅក្នុងប្រទេសលីបង់ ដែលធ្វើឱ្យខូចផែនការសន្តិភាពរបស់អាមេរិក។ កាលពីខែមុន លោក ត្រាំ ថែមទាំងបានជេរលោក ណេតាន់យ៉ាហ៊ូ ថាជាមនុស្សឡប់ឡែ និងមិនចេះដឹងគុណទៀតផង ព្រមទាំងបាននិយាយឌឺដងនៅក្នុងកិច្ចសម្ភាសន៍មួយថា លោក ណេតាន់យ៉ាហ៊ូ ច្បាស់ជាដឹងខ្លួនឯងច្បាស់ហើយថា «នរណាជាមេ» ពិតប្រាកដ នៅក្នុងរឿងនេះ៕

ប្រែសម្រួល៖ ឈាង