ព័ត៌មានអន្ដរជាតិ

ប៉ាគីស្ថាន បារម្ភពីការវាយប្រហាររបស់អ៊ីរ៉ង់លើ អារ៉ាប៊ី សាអូឌីត ព្រោះអាចទាញប៉ាគីស្ថានចូលរួមតាមរយៈកិច្ចព្រមព្រៀងការពារគ្នាទៅវិញទៅមក

បានផុស

១៩ វិនាទី មុន

នៅ

ថ្ងៃសុក្រ ១៧ កក្កដា ២០២៦

ដោយ

សង្រ្គាមនៅមជ្ឈិមបូព៌ាផ្ទុះកាន់តែខ្លាំង និង ភាពតានតឹងក៏កាន់តែខ្ពស់ ព្រោះតែការវាយប្រហារមិនមែនប៉ះពាល់តែនៅតែនៅអ៊ីរ៉ង់ប៉ុណ្ណោះទេ ថែមទាំងប៉ះដល់ប្រទេសក្នុងតំបន់ផងដែរ។ កាលពីម្សិលមិញ ក្រុមឧទ្ទាមហ៊ូធីដែលមានសម្ព័ន្ធភាពជាមួយអ៊ីរ៉ង់បានបើកការវាយប្រហារលើប្រទេសអារ៉ាប៊ីសាអូឌីត នៅសប្តាហ៍នេះ បានធ្វើឱ្យប៉ាគីស្ថានខកចិត្ត និងគំរាមកំហែងទាញទីក្រុងអ៊ីស្លាម៉ាបាដចូលទៅក្នុងជម្លោះ ព្រមទាំងធ្វើឱ្យតួនាទីរបស់ប្រទេសប៉ាគីស្ថានស្មុគស្មាញនាពេលអនាគត ក្នុងនាមជាអ្នកសម្របសម្រួលរវាងសហរដ្ឋអាមេរិក និងអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរ៉យទ័រ ផ្សាយនៅថ្ងៃទី១៦ ខែកក្កដា ឆ្នាំ២០២៦ ប្រទេសប៉ាគីស្ថានបានជួយសម្របសម្រួលកិច្ចព្រមព្រៀងបណ្តោះអាសន្នកាលពីខែមុនក្នុងសង្គ្រាមរវាងទីក្រុងវ៉ាស៊ីនតោន និងទីក្រុងតេហេរ៉ង់។

មិនតែប៉ុណ្ណោះប្រទេសប៉ាគីស្ថាន បានចុះហត្ថលេខាលើកិច្ចព្រមព្រៀងការពារជាតិទៅវិញទៅមកជាមួយប្រទេសអារ៉ាប៊ីសាអូឌីតកាលពីឆ្នាំមុន ហើយទាហានប៉ាគីស្ថានរាប់ពាន់នាក់ត្រូវបានដាក់ពង្រាយទៅកាន់ប្រទេសនេះ រួមជាមួយនឹងកងយន្តហោះចម្បាំងមួយក្រុម។

ប៉ាគីស្ថានបានសម្តែងការខកចិត្ត ចំពោះការវាយប្រហាររបស់អ៊ីរ៉ង់ទៅលើអារ៉ាប៊ីសាអូឌីតកាលពីដើមឆ្នាំនេះ ប៉ុន្តែអ្នកវិភាគនិងមន្ត្រីក្នុងតំបន់និយាយថា ការវាយប្រហារនៅសប្តាហ៍នេះបានជំរុញឱ្យទីក្រុងអ៊ីស្លាម៉ាបាដមានការខកចិត្ត ចំពោះអ៊ីរ៉ង់ដល់កម្រិតថ្មីមួយទៀត ខណៈពួកគេបង្កើនលទ្ធភាពជម្លោះរវាងអារ៉ាប៊ីសាអូឌីត និងក្រុមហ៊ូធី។

ក្រុមហ៊ូធីបានបាញ់មីស៊ីលទៅលើប្រទេសអារ៉ាប៊ីសាអូឌីត បន្ទាប់ពីចោទប្រកាន់ព្រះរាជាណាចក្រនេះថាបានទម្លាក់គ្រាប់បែកលើអាកាសយានដ្ឋានមួយរបស់ពួកគេកាលពីថ្ងៃចន្ទ។

មន្ត្រីប៉ាគីស្ថានម្នាក់ប្រាប់ទីភ្នាក់ងារសារព័ត៌មានរ៉យទ័រថា៖ « មេដឹកនាំស៊ីវិល និងយោធាកំពូលរបស់យើងបានប្រាប់អ៊ីរ៉ង់ក្នុងកម្រិតខ្ពស់បំផុតថា ការវាយប្រហារទៅលើប្រទេសអារ៉ាប៊ីសាអូឌីត គឺជាការវាយប្រហារទៅលើប្រទេសប៉ាគីស្ថាន។ វាគឺជាខ្សែបន្ទាត់ក្រហមរបស់យើង»។

លោក Muhammad Amir Rana អ្នកវិភាគសន្តិសុខប៉ាគីស្ថាននិយាយថា៖ « ប៉ាគីស្ថានមិនបានរំពឹងទុកថា ភាពតានតឹងនឹងកើនឡើងភ្លាមៗនោះទេ»។

គួរបញ្ជាក់ថា ការខកចិត្តរបស់ប៉ាគីស្ថានហាក់ដូចជាមានឫសគល់ នៅក្នុងការព្រួយបារម្ភកាន់តែខ្លាំងឡើងថាការចូលរួមរបស់ហ៊ូធីអាចទំនងជាទាញប៉ាគីស្ថានចូលទៅក្នុងជម្លោះជាងការវាយប្រហារដោយមីស៊ីលរបស់អ៊ីរ៉ង់កាលពីដើមឆ្នាំនេះ។ មន្ត្រីប៉ាគីស្ថានពីររូបនិយាយថា ទាហានប៉ាគីស្ថានត្រូវបានដាក់ពង្រាយនៅជិតព្រំដែនអារ៉ាប៊ីសាអូឌីតជាមួយប្រទេសយេម៉ែន៕

សម្រួល៖ ណឺ មិនា