អ៊ីរ៉ង់ ចេញបញ្ជាឱ្យក្រុមហ៊ូធី ត្រៀមបិទច្រកសមុទ្រក្រហម

បើ​តាមរបាយការណ៍ពីទីភ្នាក់ងារសារព័ត៌មាន Reuters ចុះផ្សាយ​ថ្ងៃទី​១៦ ខែ​កក្កដា ឆ្នាំ​២០២៦ ប្រទេស​អ៊ីរ៉ង់ បានចេញ​បញ្ជាទៅកាន់ក្រុមហ៊ូធី នៅប្រទេសយេម៉ែន ឱ្យត្រៀម​ធ្វើការបិទផ្លូវដឹកជញ្ជូនប្រេងដ៏សំខាន់មួយនៅសមុទ្រក្រហម ប្រសិនបើសហរដ្ឋអាមេរិក នៅតែបន្តកំណត់គោលដៅវាយប្រហារលើហេដ្ឋារចនាសម្ព័ន្ធថាមពលរបស់ទីក្រុងតេហេរ៉ង់។

ការ​ចេញ​បញ្ជា​នេះ ធ្វើ​ឡើង​បន្ទាប់​ពី​អាមេរិក បានបន្តបើកការវាយប្រហារទ្រង់ទ្រាយធំ ឈានចូលដល់ថ្ងៃទី៦ ដោយទម្លាក់គ្រាប់បែកលើទីតាំងសំខាន់ៗ នៅអ៊ីរ៉ង់ ខណៈការផ្ទុះធ្វើឱ្យកក្រើកទូទាំងប្រទេសនេះ កម្ទេចទាំងស្ពាន ស្ថានីយរថភ្លើង និងព្រលានយន្តហោះ។

ទន្ទឹម​នឹង​ការរង់ចាំ​​​ស្ដាប់​​បញ្ជា​ពី​អ៊ីរ៉ង់ ក្រុម​សកម្ម​ប្រយុទ្ធ​ហ៊ូធី ក៏​បានធ្វើ​ការ​គំរាមកំហែងដល់កន្លែងស្តុកប្រេងរបស់ប្រទេសអារ៉ាប៊ីសាអូឌីត ផងដែរ។

ការផ្ទុះឡើងនៃអរិភាពនេះ បានបង្ខំឱ្យបណ្តាក្រុមហ៊ុនផលិតប្រេងធំៗលើពិភពលោក ចាប់ផ្តើមប្រញាប់ប្រញាល់ស្វែងរកផ្លូវដឹកជញ្ជូនថាមពលថ្មីៗ ដើម្បីជៀសវាងការខូចខាតពីជម្លោះនេះ។ ក្រុមហ៊ុន Chevron កំពុងតែសិក្សាលើគម្រោងសាងសង់បំពង់បង្ហូរប្រេងមួយ ដែលតភ្ជាប់ពីតំបន់ប្រេងរបស់ប្រទេសអ៊ីរ៉ាក់ ឆ្ពោះទៅកាន់សមុទ្រមេឌីទែរ៉ាណេ ដោយឆ្លងកាត់តាមប្រទេសស៊ីរី។ តាមការប៉ាន់ប្រមាណរបស់ក្រុមហ៊ុន Goldman Sachs នៅត្រឹមចុងឆ្នាំ២០២៧ គម្រោងថ្មីៗចំនួន ៧ នៅក្នុងតំបន់នេះ នឹងអាចជួយការពារការនាំចេញថាមពលជិតពាក់កណ្តាលពីតំបន់ឈូងសមុទ្រ កុំឱ្យទទួលរងផលប៉ះពាល់ ប្រសិនបើមានវិបត្តិណាមួយកើតឡើងនៅច្រកសមុទ្រហ័រមូសសាជាថ្មី នាពេលអនាគត៕

ប្រែសម្រួល៖ ឈាង