កីឡា

កីឡាការិនីកម្ពុជា ២ ក្រុម ឈានដល់វគ្គពាក់កណ្តាលផ្តាច់ព្រ័ត្រពានអន្តរជាតិ

បានផុស

៩ ម៉ោង មុន

នៅ

ថ្ងៃសុក្រ ១៧ កក្កដា ២០២៦

ដោយ

ក្រុមបាល់ទាត់ជម្រើសជាតិនារីកម្ពុជា និងក្រុមកីឡាការិនីអេឡិចត្រូនិកកម្ពុជា Galaxy Phoenix បានឈានដល់វគ្គពាក់កណ្តាលផ្តាច់ព្រ័ត្រសម្រាប់ការប្រកួតពានរង្វាន់អន្តរជាតិរៀងៗខ្លួន។

ក្រុមបាល់ទាត់នារីកម្ពុជា

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់នារីកម្ពុជា បានឡើងវគ្គពាក់កណ្តាលផ្តាច់ព្រ័ត្រពានរង្វាន់អាស៊ាន AFF Women’s Cup ឆ្នាំ ២០២៦ នៅប្រទេសម៉ាឡេស៊ី បន្ទាប់ពីការប្រកួតសន្សំពិន្ទុលើកទី១ ឈ្នះ ទីម័រខាងកើត ដោយលទ្ធផល ៣-១ និងការប្រកួតសន្សំពិន្ទុលើកទី២ បានស្មើជាមួយ ឥណ្ឌូណេស៊ី ដោយលទ្ធផល ១-១ ដើម្បីរកបាន ៤ ពិន្ទុ ឈរលេខ ១ ពូល B។ នៅពូលជាមួយគ្នានេះ ឥណ្ឌូណេស៊ី ក៏មាន ៤ ពិន្ទុ ឈរលេខ ២ បានឡើងវគ្គពាក់កណ្តាលផ្តាច់ព្រ័ត្រដែរ។

នៅវគ្គពាក់កណ្តាលផ្តាច់ព្រ័ត្រ ក្រុមនារីកម្ពុជា ជួប ក្រុមនារីឡាវ ដែលជាក្រុមលេខ ២ ក្នុងពូល A ខណៈក្រុមនារីឥណ្ឌូណេស៊ី ជួបក្រុមនារីសិង្ហបុរី ជាក្រុមលេខ ១ ក្នុងពូល A។ ការប្រកួតវគ្គពាក់កណ្តាលផ្តាច់ព្រ័ត្រ ធ្វើនៅថ្ងៃទី១៩ ខែកក្កដា និងការប្រកួតវគ្គផ្តាច់ព្រ័ត្រធ្វើនៅថ្ងៃទី២១ ខែកក្កដា ឆ្នាំ ២០២៦។

ក្រុមកីឡាការិនីអេឡិចត្រូនិកកម្ពុជា Galaxy Phoenix

ងាកទៅចាប់អារម្មណ៍ព្រឹត្តិការណ៍ប្រកួតកីឡាអេឡិចត្រូនិកអន្តរជាតិ MLBB Women’s International ដែលហៅកាត់ MWI ឆ្នាំ ២០២៦ សម្រាប់ក្លិបអាជីពនៅទីក្រុងបារីស ប្រទេសបារាំង ក្រុមកីឡាការិនី Galaxy Phoenix បានកំពុងធ្វើឲ្យមានការចាប់អារម្មណ៍យ៉ាងខ្លាំងតាមរយៈជ័យជម្នះ ៣ លើកជាប់គ្នាដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។

ការប្រកួតវគ្គជម្រុះក្នុងពូលលើកទី១ ក្រុមនារីតំណាងកម្ពុជា Galaxy Phoenix បានយកឈ្នះក្រុមរបស់ហ្វីលីពីន Natus Vincere ដោយលទ្ធផល ២-០ និងការប្រកួតលើកទី២ ឈ្នះក្រុម Falcons Vega Mena របស់ប្រទេសអារ៉ាប៊ីសាអ៊ូឌីត ដោយលទ្ធផល ២-០ ទៀតដើម្បីឡើងទៅកាន់វគ្គ ៨ ក្រុមចុងក្រោយ។

នៅវគ្គ ៨ ក្រុមចុងក្រោយ ក្រុមនារីកម្ពុជា Galaxy Phoenix បានយកឈ្នះក្រុមនារីចិន SAETA ដោយលទ្ធផល ២-១ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ នេះជាលើកដំបូងដែលក្រុមនារីតំណាងឲ្យប្រទេសកម្ពុជា បានឈានដល់វគ្គពាក់កណ្តាលផ្តាច់ព្រ័ត្រ។

អ្វីដែលគួរឲ្យចាប់អារម្មណ៏នោះគឺនៅវគ្គពាក់កណ្តាលផ្តាច់ព្រ័ត្រ ក្រុម Galaxy Phoenix ត្រូវជួបក្រុមហ្វីលីពីន Natus Vincere ជាថ្មី បន្ទាប់ពីក្រុមនារីកម្ពុជាធ្លាប់បានឈ្នះកាលវគ្គជម្រុះក្នុងពូលម្តងហើយ។ ការប្រកួតវគ្គពាក់កណ្តាលផ្តាច់ព្រ័ត្រ នឹងធ្វើនៅយប់ថ្ងៃទី១៧ ខែកក្កដានេះដែលប្រើរូបមន្ត ៥ វគ្គ (Best of 5)។

នៅសល់តែមួយជំហានទៀតប៉ុណ្ណោះ ក្រុមនារីកម្ពុជា នឹងឈានដល់វគ្គផ្តាច់ព្រ័ត្រដើម្បីដណ្តើមជើងឯក មេដាយមាស និងប្រាក់រង្វាន់ ១៥ ម៉ឺនដុល្លារ៕