រំលងផុតយូរឆ្នាំ! កូនស្រីអតីតសិល្បករអាយ៉ៃ លោកតា ផ្លុង មឿក រំលឹករឿងអតីតកាលដ៏កម្សត់ជាមួយឪពុក

កូនស្រីពៅអតីតសិល្បករអាយ៉ៃលោកតា ផ្លុង មឿក បានរំលឹកអតីតកាលដ៏កម្សត់ជាមួយឪពុក ធ្វើឱ្យសាធារណជនខ្មែរមួយចំនួនក្តុកក្តួលតាមសំណេររបស់អ្នកស្រី និងរលឹកដល់ស្នាដៃសិល្បៈកាលលោកនៅមានជីវិត។ បើគិតមកដល់ពេលនេះ លោកមរណភាពពីលោកនេះទៅប្រមាណជា ៧ឆ្នាំហើយ ។

ថ្មីៗនេះ អ្នកស្រី ផ្លុង ឫទ្ធី ដែលជាកូនស្រីពៅរបស់លោកតា និងកំពុងរស់នៅក្រៅប្រទេស បានបង្ហោះរូបភាពឪពុកកាលនៅមានជីវិត ព្រមទាំងរំលឹកអនុស្សាវរីយ៍ដ៏កម្សត់ក្នុងវ័យកុមារភាព ដែលអ្នកស្រីបានឆ្លងកាត់ជាមួយឪពុក និងបងស្រីទាំងពីរ។

អ្នកស្រីបានរៀបរាប់ថា នៅពេលអ្នកស្រីមានអាយុទើបតែ ៤ឆ្នាំ ម្តាយរបស់អ្នកស្រីបានទទួលមរណភាពក្នុងសម័យប៉ុល ពត ដោយទុកឱ្យលោកតា ផ្លុង មឿក រ៉ាប់រងបន្ទុកគ្រួសារ និងថែរក្សាកូនៗក្នុងស្ថានភាពដ៏លំបាក។ អ្នកស្រីក៏បានរំលឹកពីការលះបង់ និងការតស៊ូរបស់ឪពុក រួមទាំងបងៗ ដែលបានជួយការពារ និងសង្គ្រោះជីវិតអ្នកស្រីក្នុងគ្រាដ៏លំបាកនោះផងដែរ។

តាមរយៈសារខាងលើនេះ បានធ្វើឱ្យក្តុកក្តួលដល់អារម្មណ៍សាធារណជនមួយចំនួនផងដែរ ពិសេសគឺនឹករលឹកដល់ទស្សនីយភាពសិល្បៈរបស់លោកដែលធ្លាប់កំដរអារម្មណ៍ទស្សនិកជនច្រើនឆ្នាំមុន។

គួររំលឹកថា លោកតា ផ្លុង មឿក បន្ទាប់ពីបានទទួលមរណភាពគឺបានបន្សល់ទុកនូវស្នាដៃបទចម្រៀងអាយ៉ៃល្បីៗរបស់លោកតាជាច្រើនដូចជាបទអាយ៉ៃឆ្លងឆ្លើយ ដែលមានចំណង ជើងថា “អ្នកមានរក្សាក្សត់ ដូចសំពត់ព័ទ្ធពីក្រៅ” ជាដើម៕ ដោយ ៖ ចាន់រ៉ា