ព័ត៌មានអន្ដរជាតិ

អាជ្ញាធរមូលដ្ឋានចិន ព្រមានថា ហេតុការណ៍បាក់ភ្នំអាចកើតឡើងទៀត ដោយ«មិនអាចដឹងមុន»

បានផុស

១ minute មុន

នៅ

ថ្ងៃសៅរ៍ ១៨ កក្កដា ២០២៦

ដោយ

បន្ទាប់ពីប្រទេសចិនរងការវាយប្រហារយ៉ាងធ្ងន់ធ្ងរដោយសារទឹកជំនន់បង្កឡើងដោយព្យុះទីហ្វុង Bavi ក្នុងពេលថ្មីៗនេះ ហេតុការណ៍បាក់ភ្នំមួយទៀត បានកើតឡើងប៉ះពាល់ដល់អគារពាណិជ្ជកម្មនៅភាគនិរតី ដោយសម្លាប់មនុស្សយ៉ាងហោចណាស់៨នាក់ និងបាត់ខ្លួន៣៤នាក់ នៅថ្ងៃទី១៧ខែកក្កដានេះ ។

រូបភាពនៃការបាក់ភ្នំប៉ះពាល់ដល់អគារពាណិជ្ជកម្មនៅចិន។ Social

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតីចិនលោក ស៊ី ជីនពីង បានជំរុញឱ្យមានការត្រួតពិនិត្យយ៉ាងទូលំទូលាយចំពោះហេតុការណ៍បាក់ភ្នំនៅតំបន់អគារធំៗដែលរីកអគារដ៏ច្រើន ខណៈដែលកិច្ចខិតខំប្រឹងប្រែងជួយសង្គ្រោះកំពុងបន្តនៅឡើយ។

យោងទីភ្នាក់ងារព័ត៌មានស៊ីនហ៊ូរបស់ចិន ក្រោយហេតុការណ៍បាក់ភ្នំនោះ ប្រធានាធិបតីចិន ស៊ី ជីនពីង បានជំរុញកិច្ចខិតខំប្រឹងប្រែងឱ្យអនុវត្តប្រតិបត្តិការស្វែងរក និងជួយសង្គ្រោះតាមរបៀបវិទ្យាសាស្ត្រ។

ប្រធានាធិបតី ស៊ី ជីនពីង ដ៏មានឥទ្ធិពល និងក៏ជាអគ្គលេខាធិការនៃគណៈកម្មាធិការកណ្តាលបក្សកុម្មុយនិស្តចិន (CPC) និងជាប្រធានគណៈកម្មការយោធាកណ្តាល បានសង្កត់ធ្ងន់លើតម្រូវការក្នុងការទប់ស្កាត់គ្រោះមហន្តរាយផ្សេងៗទៀតពីក្នុងគ្រោះថ្នាក់នេះ។

យោងតាម AFP ដែលដកស្រង់ការផ្សាយរបស់បណ្តាញផ្សព្វផ្សាយរដ្ឋចិន CCTV លោក Ren Xujiang មេដឹកនាំស្រុក បានប្រាប់សន្និសីទសារព័ត៌មានថា មនុស្ស ១៨ នាក់ដែលជាប់គាំងត្រូវបានជួយសង្គ្រោះ។ ក្នុងចំណោមអ្នកទាំងនោះ ប្រាំបីនាក់ត្រូវបានប្រកាសថាស្លាប់។

វីដេអូដែលបានចែកចាយលើ CCTV បង្ហាញឲ្យឃើញនូវគំនរដំថ្មធំៗ និងដីគ្របដណ្តប់ផ្នែកខ្លះនៃផ្លូវលំនៅឋាន និងពាណិជ្ជកម្មនៅតំបន់ជើងភ្នំមួយក្នុងតំបន់នោះ។

វីដេអូឃ្លីបដែលចាក់ផ្សាយដោយប្រព័ន្ធផ្សព្វផ្សាយក៏បានបង្ហាញមនុស្សស្រែក និងរត់ចេញពីពពកធូលីដែលហុយពេលរអិលបាក់ដីនោះ។

យោងតាមសេចក្តីរាយការណ៍ មន្ត្រីមូលដ្ឋានម្នាក់ បានប្រាប់សន្និសីទសារព័ត៌មានថា តំបន់ដែលការរអិលបាក់ភ្នំបានកើតឡើងត្រូវបានគេស្គាល់ថា ជាដីចោត «មិនអាចដឹងមុនបាន» ដោយបន្ថែមថា ថ្មដ៏គ្រោះថ្នាក់នៅតែមាន នៅតាមគែមច្រាំងថ្មចោទ។

ក្រសួងហិរញ្ញវត្ថុ និងក្រសួងគ្រប់គ្រងគ្រាអាសន្ន បាននិយាយថា រដ្ឋាភិបាលបានទម្លាក់ថវិកាចំនួន ៥០ លានយ័ន (ជាង៧.៣ លានដុល្លារ) ជាមូលនិធិសង្គ្រោះគ្រោះមហន្តរាយធម្មជាតិ ដើម្បីគាំទ្រដល់ប្រតិបត្តិការជួយសង្គ្រោះ និងផ្តល់ជំនួយដល់ប្រជាពលរដ្ឋដែលរងផលប៉ះពាល់៕