ព័ត៌មានជាតិ

អ្នកជំងឺកូវីដជាសះស្បើយនៅកម្ពុជាកើនឡើងដល់ជាង៣ម៉ឺននាក់ហើយ

បានផុស

៥ years មុន

នៅ

ថ្ងៃសៅរ៍ ១២ មិថុនា ២០២១

ដោយ

រហូតមកដល់ពេលនេះ មានអ្នកជំងឺកូវីដ-១៩ បានព្យាបាលជាសះស្បើយមានជាង៣ម៉ឺននាក់ហើយខណៈអ្នកស្លាប់កើនឡើងដល់ជាង៣០០នាក់ ក្នុងចំណោមអ្នកជំងឺសរុបជិត៣ម៉ឺន៨ពាន់នាក់ នៅទូទាំងប្រទេស។

បើតាមក្រសួងសុខាភិបាលបានឱ្យដឹងថា នៅថ្ងៃនេះក្រសួងបានរកឃើញអ្នកឆ្លងថ្មីចំនួន៦៣៨នាក់ទៀត ក្នុងនោះមានករណីឆ្លងសហគមន៍ចំនួន៥៩៤នាក់ និងអ្នកដំណើរមកពីបរទេសចំនួន៤៤នាក់អ្នកជាសះស្បើយចំនួន៦០៥នាក់ និងស្លាប់០៩នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអះអាងថា មូលហេតុដែលមានអ្នកជំងឺកូវីដ១៩ជាសះស្បើយច្រើន ដោយសារការចាក់វ៉ាក់សាំងការពារជំងឺកូវីដ១៩គួបផ្សំនឹងការប្រើប្រាស់ឱសថបុរាណចិនLianhuaQingwenទើបធ្វើឲ្យមានអ្នកជាសះស្បើយច្រើនក្នុង១ថ្ងៃៗ។

លោករដ្ឋមន្ត្រីបានបន្តថា «ឥឡូវនេះយើងឃើញថា អ្នកជំងឺស្រាលៗបានជាសះស្បើយមានច្រើនដោយសារតែម្យ៉ាងយើងបានចាក់ថ្នាំបង្ការគួបផ្សំនឹងថ្នាំបុរាណចិនកំពុងប្រើប្រាស់សម្រាប់ព្យាបាលអ្នកជំងឺដែលមានរោគសញ្ញាស្រាលៗ ដូចជាអ្នកជំងឺមានហៀសំបោរ ក្អក និងក្តៅខ្លួនពេលលេបទៅវាមានប្រសិទ្ធភាព។ អីចឹងទើបឃើញអ្នកជំងឺខាងក្រៅដែលនៅក្នុងមណ្ឌលព្យាបាលមានជាសះ ស្បើយច្រើន»។

លោករដ្ឋមន្ត្រីបានបន្តទៀតថា អ្នកជំងឺដែលបានទទួលបានចាក់វ៉ាក់សាំង និងប្រើថ្នាំបុរាណចិន មិនមានការវិវត្តន៍ជំងឺទៅជាធ្ងន់ដែរ បើមានធ្ងន់ក៏មានចំនួនតិចតួចដែរ ពោលគឺមានតែ២ទៅ៣នាក់ប៉ុណ្ណោះ។

គួរបញ្ជាក់ថា គិតត្រឹមព្រឹកថ្ងៃទី១២ ខែមិថុនា ឆ្នាំ២០២១ កម្ពុជាមានអ្នកឆ្លងជំងឺកូវីដ១៩សរុបចំនួន៣៧៩៥៩នាក់ អ្នកជាសះស្បើយចំនួន៣១២២២នាក់ អ្នកសម្រាកពេទ្យចំនួន៦៧៣៧នាក់និងអ្នកស្លាប់ចំនួន៣២០នាក់៕

អត្ថបទ ៖ សំអឿន