ស្ថានភាពល្អប្រសើរសម្រាប់ខេត្តស្ទឹងត្រែង​គ្មានអ្នកឆ្លងកូវីដ

រដ្ឋបាលខេត្តស្ទឹងត្រែង បានប្រកាសថា នៅថ្ងៃទី ១៨ ខែកក្កដា គ្មានអ្នកឆ្លងកូវីដ១៩ នោះទេ នៅបរិវេណទឹកដីក្នុងខេត្តមួយនេះ ខណៈអ្នកឆ្លងសរុប ៤៤៩ នាក់ និងជាសះស្បើយ ២៨៥ នាក់ និងស្លាប់ម្នាក់។

បើតាមរដ្ឋបាលខេត្ត ក្នុងរយៈពេលប៉ុន្មានថ្ងៃចុងក្រោយនេះ ត្រូវបានគេមើលឃើញថា ស្ថានភាពការរីករាលដាលជំងឺកូវីដ១៩ នៅខេត្តស្ទឹងត្រែង មានការថមថយច្រើន រកឃើញអ្នកឆ្លងតិចតួច នឹងមានអ្នកជាសះស្បើយច្រើនគួរឱ្យកត់សម្គាល់។       

ប្រធានមន្ទីរសុខាភិបាលខេត្ត លោក អ៊ុង សូវៀត បានឱ្យដឹងថា ស្ថានភាពជាសះស្បើយច្រើនជាងឆ្លងនេះ ជាសញ្ញាល្អ សម្រាប់ខេត្តស្ទឹងត្រែង ក្នុងការអនុវត្តវិធានការសុខាភិបាល ជាពិសេសនោះ និងមានការចូលរួម ពីបងប្អូនប្រជាពលរដ្ឋទាំងអស់ ផងដែរ ទើបធ្វើឲ្យស្ថានការណ៍កូវីត១៩ មានការថយចុះជាបន្តបន្ទាប់។           

លោកប្រធានមន្ទីរបញ្ជាក់បន្ថែមថា ដើម្បីទប់ស្កាត់ការរីករាលដាលជំងឺកូវីដ១៩ ទាំងការនាំចូលពីខាងក្រៅ និងខាងក្នុងភូមិសាស្រ្តខេត្តស្ទឹងត្រែង ក្រុមគ្រូពេទ្យជំនាញប្រចាំការតាមគោលដៅព្រំប្រទល់ខេត្តស្ទឹងត្រែងនិងត្រួតពិនិត្យបុគ្គលដែលធ្វើដំណើរចេញចូលសង្ស័យ ត្រូវធ្វើតេស្តរហ័សរកមេរោគកូវីដ១៩។ រីឯប្រជាពលរដ្ឋក្នុងខេត្តវិញអ្នកដែលសង្ស័យ​ថាមានឆ្លងជំងឺកូវីដ១៩ ក៏ត្រូវប្រញាប់យកសំណាក់វិភាគដូចគ្នា ទើបកាត់ផ្ដាច់ខ្សែចម្លងមេរោគបាន៕

ដោយៈ ងិនលីម