ប្រគល់រយន្តដឹកវ៉ាក់សាំង​ចំនួន​២០គ្រឿង​ ជូនមន្ទីរសុខា​ភិបាលរាជធានី-ខេត្ត

នៅរសៀលថ្ងៃទី០៣ ខែសីហា ឆ្នាំ២០២១នេះ នឹងមានពិធីប្រគល់រយន្តដឹកវ៉ាក់សាំងចំនួន២០គ្រឿង ដែលជាអំណោយដ៏ថ្លៃថ្លារបស់សប្បុរសជន តាមរយៈសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជូនទៅមន្ទីរសុខាភិបាលរាជធានី-ខេត្តចំនួន១៣ នៅឃ្លាំងឱសថកណ្តាល (CMS) ហើយលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាប្រធានគណៈកម្មាការចំពោះកិច្ចចាក់វ៉ាក់សាំង​កូវីដ-១៩ ក្នុងក្របខណ្ឌទូទាំងប្រទេស នឹងអញ្ជើញជាអធិបតីនៅក្នុងពិធីនោះ។

សម្ដេចតេជោ ហ៊ុន សែន នៅក្នុងពិធីបើកយុទ្ធនាការចាក់វ៉ាក់សាំងជូនកុមារ និងយុវវ័យ ចាប់ពី១២ ដល់១៧ ឆ្នាំ កាលពីព្រឹកថ្ងៃទី០១ ខែសីហា ឆ្នាំ២០២១ បានបញ្ជាឱ្យលោកស្រីវេជ្ជបណ្ឌិត ឱ វណ្ណឌីន ទិញរថយន្តសម្រាប់ដឹកវ៉ាក់សាំងចំនួន៤០គ្រឿងបន្ថែមទៀត ដោយប្រើប្រាស់ថវិកាបានមកពីការចូលរួមរបស់សប្បុរសជន។ 

បើតាមសម្ដេចតេជោរថយន្តនេះ ទោះបីមិនដឹកវ៉ាក់សាំងកូវីដ១៩ ក៏យើងអាចដឹកវ៉ាក់សាំងសម្រាប់ចាកឱ្យកូនក្មេងដែរពីព្រោះបច្ចប្បន្នទារកគឺជាប់កាតព្វកិច្ចចាក់វ៉ាក់សាំង៦មុខ។

លោកស្រីវេជ្ជបណ្ឌិត ឱ វណ្ណឌីន ធ្លាប់បានបញ្ជាក់ថា កន្លងមករាជរដ្ឋាភិបាលបានបញ្ជាទិញរថយន្តដឹកវ៉ាក់សាំងចំនួន៣០គ្រឿង ដើម្បីប្រគល់ជូនមន្ទីរសុខាភិបាលរាជធានីភ្នំពេញ-ខេត្ដទាំង២៥។

លោកស្រីបន្តថា រថយន្តដឹកវ៉ាក់សាំងនេះ ជាតម្រូវការចាំបាច់ណាស់ សម្រាប់ក្រុមការងារក្រុមគ្រូពេទ្យរបស់យើង ដើម្បីដឹកវ៉ាក់សាំងយកទៅចាក់វ៉ាក់សាំងការពារជំងឺកូវីដ១៩ ជូនប្រជាពលរដ្ឋយើងទូទាំងប្រទេស។ ដូច្នេះរថយន្ដនេះ នឹងបម្រើសេវាចាក់វ៉ាក់សាំងកូវីដ១៩នៅទូទាំងប្រទេសកាន់តែលឿនរហ័ស៕ ដោយៈកោះកែវ