អគ្គិភ័យឆាបឆេះជាន់ទី៤៣ នៃអាគារ WEALTH MANSION នៅជ្រោយចង្វារ ខណៈក្រុមជាងកំពុងធើ្វដេគ័រ

អគ្គិភ័យបានឆាបឆេះអគារខុនដូ WEALTH MANSION  ជាន់ទី៤៣ នៅទល់មុខ វិទ្យាល័យ ជា ស៊ីម ជ្រោយចង្វារ យ៉ាងសន្ធោសន្ធៅ បណ្ដាលឲ្យខូចខាតសម្ភារៈខាងក្នុងស្ទើរទាំងស្រុង ខណៈក្រុមជាងកំពុងធើ្វដេគ័រ ។

ហេតុការណ៍នេះបានកើតឡើងនៅវេលាម៉ោង​ ២និង២០នាទីរសៀល ថ្ងៃទី០៩​  ខែកក្កដា​ ឆ្នាំ២០២៦ ដែលស្ថិតនៅផ្លូវភ្លោះ ក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ ភ្លាមៗ សមត្ថកិច្ចការិយាល័យបង្ការពន្លត់អគ្គីភ័យ និង សង្គ្រោះនៃស្នងការនគរបាលរាជធានីភ្នំពេញ បានចេញរថយន្តជាច្រើនគ្រឿង ទៅអន្តរាគមន៍នៅទីតាំងកន្លែងកើតហេតុ។

មុនពេលកើតហេតុ គេឃើញមានផ្សែងហ៊ុយក៏ស្រាប់តែមួយសន្ទុះក្រោយ បានកើតចេញជាអណ្តាតភ្លើង ផ្សែងខ្មៅខ្មួលខ្មាញ់ពេញមេឃ ចេញពីជាន់ទី៤៣នៃអគារខុនដូខាងលើ យ៉ាងសន្ធោសន្ធៅ ភ្លាមៗនោះប្រជាពលរដ្ឋបានរាយការណ៍ទៅកាន់សមត្ថកិច្ចមូលដ្ឋាន ដើម្បីបន្តទាក់ទងទៅកាន់មន្រ្តីជំនាញរបស់ការិយាល័យបង្ការ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពញ មកអន្តរាគមន៍បាញ់ពន្លត់ ។ លោកវរសេនីយ៍ឯក ព្រហ្ម យ៉ន នាយការិយាល័យនគរបាល បង្ការពន្លត់អគ្គិភ័យ និងសង្គ្រោះ បានបញ្ជារអោយរថយន្តចេញ ជាច្រើនគ្រឿង ដើម្បីមកបាញ់ពន្លត់ទប់ស្កាត់អគ្គិភ័យ កុំអោយរាលដាលដល់ផ្ទះដទៃផ្សេងទៀត ។

ក្នុងប្រតិបត្តិការនេះ នគរបាលការិយាល័យបង្ការពន្លត់អគ្គីភ័យនិងសង្គ្រោះនៃ បានឲ្យដឹងជាបឋមថា  សម្ភារៈ និង គ្រឿងដេគ័រដែលទុកសម្រាប់ដេគ័រនៅជាន់នៅទី៤៣ ត្រូវភ្លើងឆេះរងការខូចខាត។ ទាក់ទិននឹងមូលហេតុដែលនាំឲ្យកើតមានអគ្គីភ័យនេះសមត្ថកិច្ចពុំទាន់ដឹងពីមូលហេតុឡើយកំពុងតែធ្វើការស្រាវជ្រាវ៕