ខេត្តកណ្តាលចាប់ផ្តើមដំណើរព្យាបាលអ្នកជំងឺកូវីដ-១៩ កម្រិតស្រាល ដោយស្ម័គ្រចិត្តតាមផ្ទះ

ភ្នំពេញ៖ខេត្តកណ្តាលបានចាប់ផ្តើមដំណើរព្យាបាលអ្នកជំងឺកូវីដ-១៩ កម្រិតស្រាល ដោយស្ម័គ្រចិត្តតាមផ្ទះបន្ទាប់ពីមានការអនុញ្ញាតជាផ្លូវការពីក្រសួងសុខាភិបាលរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ សោភ័ណ្ឌ អភិបាលខេត្តកណ្តាលបានមានប្រសាសន៍ថារដ្ឋបាលខេត្តកណ្តាល បានទទួលគោលការណ៍អនុញ្ញាតឱ្យធ្វើការអនុវត្ត ការគ្រប់គ្រង ថែទាំ និងព្យាបាលអ្នកជំងឺកូវីដ-១៩ កម្រិតស្រាល ដោយស្ម័គ្រចិត្តតាមផ្ទះ។ ដូចនេះប្រសិនបើបងប្អូនប្រជាពលរដ្ឋ និងសាធារណជនទាំងអស់ក្នុងមូលដ្ឋានខេត្តកណ្តាល មានករណីឆ្លងមេរោគកូវីដ-១៩ និង តម្រូវការពិគ្រោះយោបល់ពាក់ព័ន្ធនឹងការគ្រប់គ្រង ថែទាំ និងព្យាបាលអ្នកជំងឺកូវីដ-១៩ កម្រិតស្រាល ដោយស្ម័គ្រចិត្តនៅតាមផ្ទះ សូមទំនាក់ទំនងតាមរយៈលេខទូរស័ព្ទជាមួយអាជ្ញាធរបាន។

តាមរយៈសេចក្ដីជូនដំណឹងស្តីពីការបង្កើតលេខទូរស័ព្ទពិរសស ប្រចាំការ២៤ម៉ោង តាមបណ្តាក្រុងស្រុក ដើម្បីគ្រប់គ្រង ថែទាំ និងព្យាបាលអ្នកជំងឺតូចីដ-១៩ កម្រិតស្រាល ដោយស្ម័គ្រចិត្តតាមផ្ទះ ព្រមទាំងទីតាំងបិទខ្ទប់ចត្តាឡីស័កដោយសារជំងឺកូវដ-១៩ លោកអភិបាលខេត្តបានបន្តថា ចំពោះប្រជាពលរដ្ឋដែលត្រូវទៅទទួលការពិគ្រោះយោបល់ គ្រប់គ្រងថែទាំ និងព្យាបាលអ្នកជំងឺកូដែ-១៩ កម្រិតស្រាល ដោយស្ម័គ្រចិត្តតាមផ្ទះ ត្រូវអនុវត្តឱ្យបានខ្ជាប់ខ្ជួន តាមគោលការណ៍ណែនាំរបស់ក្រសួងសុខាភិបាល ដូចមានចែងក្នុងឯកសារឧបសម្ព័ន្ធប្រកាសលេខ ២៩៦ សខល ចុះថ្ងៃទី២០ ខែមិថុនា ឆ្នាំ២០២១ ស្តីពីការ ដាក់ឱ្យប្រើប្រាស់នីតិវិធីប្រតិបត្តិស្តង់ដារ សម្រាប់គ្រប់គ្រង ថែទាំ និងព្យាបាលអ្នកជំងឺកូវឹង-១៩ នៅតាមផ្ទះ និងការណែនាំរបស់អាជ្ញាធរមានសមត្ថកិច្ច។

លោកអភិបាលខេត្តបានបន្តទៀតថា  ក្នុងករណី អនុវត្តផ្ទុយពីការណែនាំក៏ដូចជាគោលការណ៍នានា របស់ក្រសួង ស្ថាប័ន អាជ្ញាធរនឹងចាត់វិធានការរដ្ឋបាល ចំពោះការមិនគោរពតាមការណែនាំ និងអាចឈានដល់ ការអនុវត្តច្បាប់ចំពោះបុគ្គល ដែលប្រព្រឹត្តិល្មើសធ្ងន់ធ្ងរ ដល់កិច្ចខិតខំទប់ស្កាត់ប្រយុទ្ធប្រឆាំង នឹងការឆ្លងរាលដាល ជំងឺកូវីដ-១៩។

លោកអភិបាលខេត្តបានបញ្ជាក់ថា អាស្រ័យដូចបានជម្រាបជូនខាងលើនេះ សូមបងប្អូនប្រជាពលរដ្ឋ និងសាធារណជន ជាពិសេស ប្រជាពលរដ្ឋទាំងអស់ ដែលកំពុងស្នាក់នៅក្នុងភូមិសាស្ត្រខេត្តកណ្តាល មេត្តាជ្រាបជាព័ត៌មាន និងចូលរួម សហការអនុវត្តការងារនេះ ឱ្យមានប្រសិទ្ធភាពខ្ពស់។

ក្រសួងសុខាភិបាលបានពង្រីកវិសាលភាពការព្យាបាលអ្នកជំងឺកូវីដ-១៩កម្រិតស្រាល នៅតាមផ្ទះនៅទូទាំងប្រទេសដើម្បីជួយសម្រួលបន្ទុកនៅតាមមន្ទីរពេទ្យ ខណៈបច្ចុប្បន្នកំពុងដំណើរការនៅរាជធានីភ្នំពេញ ខេត្តបន្ទាយមានជ័យ និងខេត្តកណ្តាល។

ក្រសួងបានណែនាំដល់អភិបាលនៃគណៈអភិបាលខេត្តត្រូវពិនិត្យ និងរៀបចំលក្ខណៈសម្បត្តិ និងពេលវេលាសមស្របដើម្បីដាក់ឱ្យដំណើរការព្យាបាលអ្នកជំងឺកូវីដ-១៩ ស្រាល និងគ្មានរោគសញ្ញានៅផ្ទះក្នុងភូមិសាស្ត្រខេត្តនីមួយៗ៕

អត្ថបទ៖ សំអឿន