អាជ្ញាធរខេត្តកណ្ដាល រៀបចំតុបតែងភ្លើងលម្អបំភ្លឺ សម្រាប់សង្ក្រាននៅសួនច្បារមាត់ទន្លេបាសាក់ ក្រុងតាខ្មៅ

ដើម្បីចូលរួមអបអរសាទរពិធីបុណ្យចូលឆ្នាំប្រពៃណីជាតិខ្មែរ ដែលរដ្ឋបាលខេត្តកណ្តាល បានរៀបចំព្រឹត្តិការណ៍សង្ក្រាន្តខេត្តកណ្តាល នៅសួនច្បារមាត់ទន្លេបាសាក់ ក្រុងតាខ្មៅ ដោយតុបតែងភ្លើងលម្អបំភ្លឺក្រុង និង រៀបចំទីតាំងដាក់តាំងរូបសេះតំណាងឲ្យ ឆ្នាំមមី ដែល ជាឆ្នាំទី៧ ក្នុងចំណោមឆ្នាំនៃចក្រវត្តិឆ្នាំទាំង១២។

កាលពីថ្ងៃទី១២ ខែមេសា ឆ្នាំ២០២៦ លោក ជី ស៊ីវុត្ថា នាយករដ្ឋបាលសាលាខេត្ត និងជាអនុប្រធានគណៈកម្មាការល្បែងប្រជាប្រិយ និងការប្រគុំតន្ត្រី បានដឹកនាំយុវជនហាត់សមត្រៀមចូលរួមលេងល្បែងប្រជាប្រិយ និងបានចុះពិនិត្យទីតាំងកន្លែងរៀបចំភូមិល្បែងប្រជាប្រិយ សម្រាប់ឱ្យប្រជាពលរដ្ឋ ភ្ញៀវជាតិ និងអន្តរជាតិ អញ្ជើញចូលរួមលេងកម្សាន្តសប្បាយ

សូមបញ្ជាក់ផងដែរថា រដ្ឋបាលខេត្តកណ្ដាលបានរៀបចំល្បែងប្រជាប្រិយ សង្ក្រាន្តឆ្នាំថ្មី ២០២៦រួមមាន៖ ល្បែងចោលឈូង ល្បែងបោះអង្គុញ ល្បែងទាញព្រ័ត ល្បែងលោតបាវ ល្បែងលោតអន្ទាក់ខ្សែ ល្បែងដណ្ដើមស្លឹកឈើ ល្បែងវាយក្អម ល្បែងទូលក្អម និងល្បែងគោះអង្រែ។

ក្នុងនោះផងដែរអាជ្ញាធរខេត្ត ក៏សូមសំណូមពរទៅដល់ប្រជាពលរដ្ឋទាំងអស់នៅចូលឆ្នាំប្រពៃណីជាតិខ្មែរខាងមុខនេះ សូមចូលរួមតុបតែងលម្អនៅតាមលំនៅដ្ឋាន និងនៅតាមដងផ្លូវមុខផ្ទះរបស់ខ្លួនឲ្យបានស្អាត កុំចោលសំរាមពាសវាសកាលត្រូវទុកដាក់សំរាមឲ្យបានត្រឹមត្រូវ មានអនាម័យបរិស្ថានល្អ ដើម្បីទទួលបាននូវសេរីសួស្ដីឆ្នាំថ្មីទាំងអស់គ្នា។

ហើយនៅពេលដែលដើរលេងកម្សាន្តសូមមេត្តាទុកដាក់សំរាមអោយបានត្រឹមត្រូវ និងថែរក្សាអនាម័យសណ្ដាប់ធ្នាប់សារធារណៈទាំងអស់គ្នា។ ជាពិសេសសូមចូលរួមគោរពច្បាប់ចរាចរណ៍ទាំងអស់គ្នា បើកបរដោយប្រុងប្រយ័ត្ន និងយោគយល់អធ្យាស្រ័យគ្នាទៅវិញទៅមកក្នុងនាមខ្មែរតែមួយ ពេលចតយានយន្តតាមផ្ទះ ឬតាមដងផ្លូវសូមចត់ឲ្យមានសណ្ដាប់ធ្នាប់ ចៀសវាងកុំបង្កការកកស្ទះចរាចរណ៍ដល់អ្នកដទៃ។

សង្ក្រាន្តខេត្តកណ្ដាលនៅក្រុងតាខ្មៅឆ្នាំនេះ រដ្ឋបាលខេត្តកណ្ដាល រៀបចំប្រារព្ធរយៈពេល ៣ថ្ងៃ គឺចាប់ពីថ្ងៃទី១៤ -១៥ -១៦ ខែមេសា ឆ្នាំ២០២៦ ខាងមុខ៕ អត្ថបទ៖ អុឹងម៉េង