សង្កាត់ចាក់អង្រែរងការលិច​លង់​ពេលភ្លៀងធ្លាក់ខ្លាំង

ចៅសង្កាត់ចាក់អង្រែក្រោមលោក ជា សុខៃ ប្រាប់កម្ពុជាថ្មី នៅរសៀលថ្ងៃទី ៣ ខែកញ្ញានេះថា ក្នុងសប្តាហ៍នេះភូមិចំនួន២ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានរងការលិចលង់ដោយជំនន់ទឹកភ្លៀងនៅពេលដែលភ្លៀងធ្លាក់ខ្លាំង។

មូលហេតុដែលរងការលិចលង់លំនៅដ្ឋានប្រជាពលរដ្ឋក្នុងភូមិព្រែកតាឡុង ព្រែកតាឡុង១ដោយសារតែស្ទះទឹកចេញពីលូដែលកន្លងមកមុខលូហូចុះទៅបឹង។ប៉ុន្តែដោយសារម្ចាស់ដីគេលុបបឹងទៅទើបធ្វើឲ្យទឹកស្ទះហូរចូលទៅប្រឡាយធំមិនទាន់។

លោក ជា សុខៃ បានបញ្ជាក់ថា ពេលនេះអាជ្ញាធរបានដាក់គ្រឿងចក្រចុះកាយមុខទឹកដើម្បីឲ្យហូចុះទៅស្ទឹងជ្រៅហើយអាចទប់ស្កាត់មិនឲ្យលិចលង់លំនៅដ្ឋានប្រជាពលរដ្ឋទៀតហើយ។

ដោយឡែកសង្កាត់ចាក់អង្រែលើវិញក៏រងការលិចលង់ចំនួន៥ភូមិផងដែរ។ប៉ុន្តែភូមិដែលលិចលង់ខ្លាំងគឺភូមិព្រែកតាគង់ និងព្រែកតាគង់៣។

លោក កែវ សាវឿន ចៅសង្កាត់ចាក់អង្រែលើបានប្រាប់កម្ពុជាថ្មីថា រាល់ពេលភ្លៀងធ្លាក់ខ្លាំងធ្វើឲ្យទឹកហូរចូលលូមិនទាន់បង្កឲ្យលិចលង់លំនៅដ្ឋានប្រជាពលរដ្ឋមួយចំនួន។ លុះដល់ភ្លៀងរាំងទៅបានប្រមាណជា៣ទៅ៤ម៉ោងទើបទឹកស្រកអស់៕

អត្ថបទៈ នរា