ទីបំផុត តាលីបង់ វាយដណ្ដើមបានតំបន់សំខាន់ៗនៃខេត្តរបស់ចលនាតស៊ូប្រដាប់អាវុធ អាហ្វហ្គានីស្ថាន ហើយ

លោក Bilal Karimi អ្នកនាំពាក្យក្រុមតាលីបង់បាននិយាយកាលពីថ្ងៃសៅរ៍ថា “តំបន់ Khenj ដែលជាតំបន់យុទ្ធសាស្ត្រខ្លាំងបំផុតរបស់ខេត្តជ្រលងភ្នំ Panjshir និងតំបន់ Anaba ក្បែររដ្ឋធានីខេត្តមួយនេះ ត្រូវបានក្រុមតាលីបង់រឹបអូសយកបានទាំងស្រុងហើយ ដោយនៅសល់តែអគារសំខាន់មួយទៀតនៃតំបន់ Abshar ប៉ុណ្ណោះ” ។

លោក Karimi បាននិយាយថា ឥឡូវនេះក្រុមតាលីបង់បានគ្រប់គ្រងលើស្រុកចំនួន ៤ នៃខេត្ត Panjshir ហើយក្រុមសកម្មប្រយុទ្ធកំពុងធ្វើដំណើរឆ្ពោះទៅមជ្ឈមណ្ឌលសំខាន់ៗនៃខេត្តនេះទៀត ។

កាលពីថ្ងៃព្រហស្បតិ៍ដោយដកស្រង់ប្រភពពីតាលីបង់ ប្រព័ន្ធផ្សព្វផ្សាយបានរាយការណ៍ថា ក្រុមតាលីបង់បានសម្រេចចិត្តបើកប្រតិបត្តិការយោធា ប្រឆាំងនឹងកងកម្លាំងរណសិរ្សតស៊ូជាតិ (NRF) នៅខេត្ត Panjshir បន្ទាប់ពីបរាជ័យក្នុងការចរចាជាមួយមេដឹកនាំគឺលោក Ahmad Massoud ។

នៅដើមខែសីហា ក្រុមតាលីបង់បានបង្កើនការវាយលុកប្រឆាំងនឹងកងកម្លាំងរដ្ឋាភិបាលនៅអាហ្វហ្គានីស្ថាន ខណៈនៅថ្ងៃទី ១៥ ខែសីហា ក្រុមតាលីបង់បានចូលដល់រដ្ឋធានីកាប៊ុល និងគ្រប់គ្រងវិមានប្រធានាធិបតី ហើយនៅថ្ងៃបន្ទាប់បានប្រកាសថា សង្គ្រាមនៅអាហ្វហ្គានីស្ថានបានបញ្ចប់ហើយ ។

ទន្ទឹមនោះ ការដណ្តើមអំណាចដោយតាលីបង់ក៏បានធ្វើឲ្យអាមេរិកបង្កើនការជម្លៀស និងដកទ័ពចេញពីប្រទេសអាហ្វហ្គានីស្ថាន ដែលបានបិទបញ្ចប់នៅយប់ថ្ងៃទី ៣១ ខែសីហា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វីដេអូ ក្រុមតាលីបង់ ដង្ហែសម្ញែងអាវុធ រួមទាំងអាវកាក់បំផ្ទុះគ្រាប់បែកអត្តឃាត និងអួតអាងក្បាច់គុនរបស់យុទ្ធជន