ព័ត៌មានជាតិ

មន្ទីរវប្បធម៌និងវិចិត្រសិល្បៈខេត្តឧត្តរមានជ័យ ធ្វើពិធីសែនព្រេនសុំបើកការដ្ឋានលើកពូនផ្លូវ ប្រវែង៤០០ម៉ែត្រ ចូលប្រាសាទអូរស្វាយ

បានផុស

៤ years មុន

នៅ

ថ្ងៃចន្ទ ១៣ កញ្ញា ២០២១

ដោយ

ឧត្តរមានជ័យ ៖ នៅថ្ងៃទី១៣ ខែកញ្ញា ឆ្នាំ២០២១ លោក ហុង យឿន ប្រធានមន្ទីរវប្បធម៌និងវិចិត្រសិល្បៈខេត្តឧត្តរមានជ័យ បានអញ្ជើញចូលរួមធ្វើពិធីសែនព្រេន សុំម្ចាស់ទឹកម្ចាស់ដី បើកការដ្ឋានលើកពូនផ្លូវ ប្រវែង បណ្តោយ ៤០០ ម៉ែត្រ ទទឹង ៥ ម៉ែត្រ ចូលប្រាសាទអូរស្វាយ និងកាប់ឆ្ការត្រួសត្រាយព្រៃ បារពើកចេញពីស្រះបុរាណ ដើម្បីកែលម្អសោភ័ណភាព និងលើកតម្លៃសម្បត្តិបេតិកភណ្ឌ វប្បធម៌ជាតិ ក៏ដូចជាតំបន់រមណីយដ្ឋានប្រវត្តិសាស្ត្រ និងបុរាណវិទ្យាមួយនេះ អោយកាន់តែមានភាពល្អប្រសើរឡើង ដើម្បីទាក់ទាញភ្ញៀវទេសចរណ៍ និងអ្នកសិក្សាស្រាវជ្រាវ អោយមកចូលទស្សនា ហើយនិងសិក្សាស្វែងយល់ ពីប្រាសាទបុរាណខ្មែរ ដែលមានទីតាំងស្ថិតនៅភូមិទំនប់អភិវឌ្ឍន៍ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីសែនព្រេននេះ មានការចូលរួមពីនគរបាលការពារបេតិកភណ្ឌខេត្ត និងមន្ត្រីជំនាញរបស់មន្ទីរ អាជ្ញាធរដែនដីហើយនិងប្រជាពលរដ្ឋរស់នៅជុំវិញប្រាសាទផងដែរ។

សូមបញ្ជាក់ផងដែរថា ការលើកពូនផ្លូវ និងកាប់ឆ្ការត្រួសត្រាយព្រៃ សម្អាតបរិវេណបុរាណដ្ឋាននេះ គឺបានទទួលការជួយឧបត្ថម្ភជំនួយ ពី “កិច្ចសហប្រតិបត្តិការអាល្លឺម៉ង់(GIZ) តាមរយៈរដ្ឋបាលខេត្តឧត្តរមានជ័យ ជាពិសេសដោយមានការយកចិត្តទុកដាក់និងជួយគាំទ្រពីឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ ក្នុងកម្មវិធីអភិវឌ្ឍសេដ្ឋកិច្ចមូលដ្ឋានដំណាក់កាលទី៤ របស់ខេត្ត លើគម្រោង “ស្តារជីវភាពរស់នៅរបស់ប្រជាពលរដ្ឋមាតុភូមិនិវត្តន៍ពីប្រទេសថៃដែលរងផលប៉ះពាល់ដោយសារវិបត្តិកូវីត ១៩” ហើយនេះគឺជាគម្រោងទី៣ និងចុងក្រោយ ដែលអនុវត្តន៍ដោយមន្ទីរវប្បធម៌ និងវិចិត្រសិល្បៈខេត្ត ដើម្បីលើកតម្លៃ និងកែលម្អសោភ័ណភាពនៅជុំវិញបុរាណដ្ឋាន ដែលជាសម្បត្តិបេតិកភណ្ឌវប្បធម៌របស់យើងទាំងអស់គ្នា ក៏ដូចជាជួយផ្តល់ការងារជូនដល់ពលករមាតុភូមិនិវត្តន៍និងប្រជាពលរដ្ឋនៅក្នុងតំបន់ក្នុងបរិបទជំងឺកូវីដ១៩៕

ដោយ ៖ ចាន់ ធី