ប្រឡូកសិល្បៈជាង ៤០ឆ្នាំ ពេលនេះ Mr. Bean សល់លុយប៉ុន្មានក្នុងដៃ?

រាប់ចាប់ពីឈានជើងចូលវិស័យសិល្បៈដំបូង មកទល់នឹងពេលបច្ចុប្បន្ន តារាកំប្លែងល្បីឈ្មោះ Mr. Bean ចំណាយពេលទៅលើអាជីពមួយនេះជាង ៤០ឆ្នាំមកហើយ ខណៈទ្រព្យសម្បត្តិដែលរកបាន និងសល់ក្នុងដៃ គិតត្រឹមឆ្នាំ ២០២១ ត្រូវគេប៉ាន់ប្រមាណថាមានចំនួន ១៥០លានដុល្លារអាមេរិក។

ចំនួនទឹកប្រាក់ប៉ុនណេះ បាន​ធ្វើ​ឱ្យ​តារា​កំប្លែង​រូបនេះ ​ត្រូវ​បាន​គេ​ចាត់​ទុក​​ជា​តារា​កំប្លែង​មាន​បំផុត​នៅក្នុង​លោក។ នេះបើតាមការចុះផ្សាយដោយ IMDb។

ក្រៅពីនោះ លោក Rowan Atkinson ឬ Mr. Bean ក៏មាន​​ផលិតកម្មផ្ទាល់ខ្លួន​មួយផងដែរ ​ឈ្មោះ Hindmeck ដែលសារព័ត៌មាននានាទម្លាយថា វាជាប្រភពចំណូលរាប់លាន​ បន្ថែមពីលើកម្រៃបានមកពីសិល្បៈ។

មិនត្រឹមតែប៉ុណ្ណោះ ការកើនឡើងទ្រព្យសម្បត្តិរបស់តារាសញ្ជាតិអង់គ្លេសរូបនេះជាបន្តបន្ទាប់ ដោយសារលោកទទួលបានប្រាក់បន្ថែមពីលើកម្មវិធីទូរទស្សន៍ Mr. Bean ក្រោយកម្មវិធីនេះផ្ទុះការគាំទ្រ និងបានផលិតជាស៊េរីភាគចំនួន ១៥វគ្គ។

យោងតាមរបាយការណ៍របស់ The Richest បានឱ្យដឹងថា ​ស៊េរីវីដេអូដ៏ពេញនិយមមួយនេះ ត្រូវបានជ្រើសរើសបញ្ចាំងនៅលើយន្តហោះ តាមបណ្ដាក្រុមហ៊ុនអាកាសចរណ៍នានា ហើយវាបានលក់សិទ្ធិឱ្យទៅប្រទេសចំនួន ៩៤ នៅទូទាំងពិភពលោក ខណៈ Mr. Bean រកចំណូលបានពីការលក់សិទ្ធិនេះ ជាង ១២លានដុល្លារអាមេរិក។

ចំណែកទ្រព្យសម្បត្តិផ្សេងទៀតរបស់បុរសវ័យ ៦៦ឆ្នាំរូបនេះ គឺលោកជាម្ចាស់ឡានទំទើប តម្លៃជាង ២២ម៉ឺនដុល្លារ និងមានវីឡាស្កឹមស្កៃ តម្លៃជាង ៣.៩លានដុល្លារអាមេរិកថែមទៀតផង។

ក្រោយលេចមុខសម្ដែងតួ Mr. Bean ​លោក Rowan Atkinson ត្រូវបានមនុស្សរាប់លានស្រឡាញ់គាំទ្រ និងដាក់រហ័ស្សនាមថា អធិរាជកំប្លែង។ រហូតដល់ពេលនេះ លោកមិនត្រឹមតែជាតារាកំប្លែងនោះទេ លោកក៏ជាតារាសម្ដែង និងជាអ្នកសរសេរអត្ថបទភាពយន្តឆ្នើមម្នាក់ផងដែរ៕

ប្រែសម្រួល៖ សន្យា

ចុចអាន៖ បងថ្លៃ Travis Scott រងការរិះគន់យ៉ាងចាស់ដៃ ក្រោយទម្លាយរូបស៊ិចស៊ី មិនខ្វល់សោកនាដកម្មរត់ជាន់គ្នា

ចុចអាន៖ កម្រមានអ្នកដឹង ជីវិតស្នេហា Mr Bean ជាមួយអតីតប្រពន្ធ និងមិត្តស្រីវ័យក្មេងជាង ៣០ឆ្នាំ