ព័ត៌មានជាតិ

ចោរឆក់កាបូបអ្នកធ្វើអនាម័យអស់លុយជាង១ពាន់ដុល្លារទាំងព្រឹកនៅខណ្ឌពោធិ៍សែនជ័យ

បានផុស

៥ years មុន

នៅ

ថ្ងៃព្រហស្បតិ៍ ១១ វិច្ឆិកា ២០២១

ដោយ

ជនសង្ស័យ១ក្រុមមានបក្ខពួក៤នាក់ បានធ្វើសកម្មភាពឆក់កាបូបពីស្ត្រីម្នាក់បានសម្រេច ខណ:កំពុងជិះម៉ូតូទៅកន្លែងធ្វើការ បង្កការភ្ញាក់ផ្អើលកាលពីវេលាម៉ោង០៧និង៣៥នាទី ព្រឹកថ្ងៃទី១១ ខែវិច្ឆិកា ឆ្នាំ២០២១ នៅតាមមហាវិថី ឈ្នះឈ្នះ ភូមិស្រែតេជ្ជ: សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះត្រូវបានគេស្គាល់ឈ្មោះ ជុំ ផា ហៅ ជាម ភេទស្រី អាយុ៤២ឆ្នាំ មុខរបរបុគ្គលិកកម្មករផ្នែកអនាម័យ មានទីលំនៅ ខេត្តកំពុងស្ពឺ បាត់បង់ក្នុងកាបូប លុយចំនួន៦០ម៉ឺនរៀល ខ្សែកប្លាទីន៥ជី ចិញ្ចៀនប្លាទីន ២,៥ជី ទូរស័ព្ទដៃ ១គ្រឿង អត្តសញ្ញាណប័ណ្ណ និងឯកសារមួយចំនួនទៀត សរុបជាទឹកប្រាក់អស់ជាង១ពាន់ដុល្លារ ។

ជនរងគ្រោះបានឲ្យដឹងថា មុនកើតហេតុរូបគាត់ជិះម៉ូតូ ធ្វើដំណើរមកពីមើលផ្ទះនៅខេត្តកំពង់ស្ពឺ ឆ្ពោះទៅកន្លែងធ្វើការនៅខណ្ឌចំការមន ដោយធ្វើដំណើរកាត់តាមមហាវិថី ឈ្នះ ឈ្នះ ពីត្បូងទៅជើង លុះដល់ចំណុចកើតហេតុ ស្រាប់តែលេចមុខជនសង្ស័យ១ក្រុមមានគ្នា៤នាក់ ជិះម៉ូតូហុងដាសេ១២៥ ចំនួន២គ្រឿង តាមពីក្រោយ ដល់ចំណុចកើតហេតុខាងលើ ក៏ក្រុមជនសង្ស័យ ឆក់យកកាបូបលុយរបស់គាត់គេចខ្លួនបាត់ ដែលធ្វើអោយរូបគាត់ដួលម៉ូតូរងរបួសផងដែរ ។

បើតាមប្រភពពីប្រជាពលរដ្ឋដែលនៅក្បែរកន្លែងកើតហេតុបានឲ្យដឹងថា នៅទីតាំងកើតហេតុតែងតែមានបទល្មើសឆក់កើតឡើងជាហូរហែរ ធ្វើឲ្យប្រជាពលរដ្ឋមានការព្រួយបារម្ភខ្លាំងណាស់ ។

ដោយបញ្ហានេះ ពួកគាត់សូមស្នើអាជ្ញាធរមានសមត្ថកិច្ចខណ្ឌពោធិ៍សែនជ័យ មេត្តាជួយពង្រឹងសន្តិសុខ សុវត្ថិភាពជូនប្រជាពលរដ្ឋអោយបានល្អប្រសើរផង៕

អត្ថបទ៖ រ៉ាវុទ្ធ