រថយន្តព្រូសបុករថយន្តស្តារិចពីក្រោយ រងការខូចខាត

ភ្នំពេញ​៖​ បុរសម្នាក់បេីករថយន្តក្នុងល្បឿនលឿនទាំងស្ថានភាពស្រវឹង បានជ្រុលបុករថយន្តស្តារិចមួយគ្រឿងពីក្រោយពេញទំហឹងបណ្តាលឱ្យរងការខូចខាតយ៉ាងដំណំ​ កាលពីវេលាម៉ោង៨យប់ថ្ងៃទី១៦​ ខែវិច្ឆិកា​ ឆ្នាំ២០២១​ នៅចំណុចច្រកចូលវត្តគោកខ្សាច់​ តាមបណ្តោយផ្លូវជាតិលេខ៣​ ស្ថិតក្នុងសង្កាត់ភ្លេីងឆេះរទះ​ ខណ្ឌកំបូល​ រាជធានីភ្នំពេញ​។

តាមប្រភពព័ត៌មានពីកន្លែងកេីតហេតុបានឱ្យដឹងថា​ គេបានឃេីញរថយន្តម៉ាកស្តារិច​ ពណ៌ស​ ពាក់ស្លាកលេខភ្នំពេញ2K 4153 ធ្វេីដំណេីរតាមបណ្តោយផ្លូវជាតិលេខ៣​ ក្នុងទិសដៅពីជេីងទៅត្បូងខណៈមកដល់ចំណុចកេីតហេតុ ស្រាប់តែមានបុរសម្នាក់បេីករថយន្តម៉ាកព្រូស​ ពណ៌ទឹកប្រាក់​ ពាក់ស្លាកលេខភ្នំពេញ2BB 0394 បេីកបរទាំងស្ថានភាពស្រវឹង​ជោគ​ធ្វេីដំណេីរមកពីក្រោយក្នុងល្បឿនលឿន ក៏ជ្រុលបុកពេញទំហឹងបណ្តាលឱ្យរថយន្តបង្ករងការខូចខាតផ្នែកខាងមុខយ៉ាងដំណំ តែសំណាងមិនមានមនុស្សរងរបួស​ ។

ក្រោយកេីតហេតុ សមត្ថកិច្ចមូលដ្ឋានបានចុះមកដល់ចំណុចកេីតហេតុនិងទំនាក់ទំនងជំនាញមកធ្វេីការវាស់វែងយករថយន្តទាំង២គ្រឿងយកទៅរក្សាទុកនៅអធិការដ្ឋាននគរបាលខណ្ឌកំបូលដេីម្បីរងចាំដោះស្រាយពេលក្រោយ៕

អត្ថបទ៖សុខា