ក្រុមហ៊ុនមួយទៀត អះអាងថា ថ្នាំរបស់ខ្លួន អាចយកឈ្នះ Omicron បាន

ក្រុមហ៊ុនឱសថ GlaxoSmithKline នៅថ្ងៃព្រហស្បតិ៍ទី២ខែធ្នូនេះបាននិយាយថា ការវិភាគមន្ទីរពិសោធន៍នៃការព្យាបាលជំងឺកូវីដ១៩ ផ្អែកលើអង់ទីគ័រដែលខ្លួនកំពុងអភិវឌ្ឍជាមួយដៃគូអាមេរិក Vir បានបង្ហាញថា ថ្នាំរបស់ខ្លួនមានប្រសិទ្ធភាពប្រឆាំងនឹងវីរុសបំប្លែងថ្មី Omicron។

នៅក្នុងសេចក្តីថ្លែងការណ៍មួយ ក្រុមហ៊ុនផលិតថ្នាំអង់គ្លេសមួយនេះបាននិយាយថា ការធ្វើតេស្តមន្ទីរពិសោធន៍ និងការសិក្សាលើសត្វកណ្តុរបានបង្ហាញថា ថ្នាំ Sotrovimab មានសមត្ថភាពប្រឆាំងនឹងមេរោគដែលត្រូវបានបង្កើតឡើងដោយវិស្វកម្មជីវសាស្រ្តដោយ មេរោគនេះមានផ្ទុកបម្រែបម្រួលសំខាន់ៗមួយចំនួនដូចទៅនឹងវីរុសបំប្លែងថ្មី Omicron ដែរ។

ទោះបីជាយ៉ាងណាក៏ដោយ ការធ្វើតេស្តកំពុងបន្តដើម្បីបញ្ជាក់លទ្ធផល ប្រឆាំងនឹងបម្រែបម្រួលរបស់វីរុស Omicron ទាំងអស់ ហើយការធ្វើបច្ចុប្បន្នភាពត្រូវបានគេរំពឹងទុកថានឹងបញ្ចេញនៅចុងឆ្នាំនេះ។

ព័ត៌មាននេះកើតឡើង បន្ទាប់ពីគណៈកម្មាធិការជំនាញមួយ បានបោះឆ្នោតដើម្បីផ្តល់អនុសាសន៍ឲ្យរដ្ឋបាលចំណីអាហារនិងឱសថអាមេរិក (FDA) អនុញ្ញាតថ្នាំគ្រាប់ព្យាបាលជំងឺកូវីដ១៩របស់ក្រុមហ៊ុន Merck សម្រាប់មនុស្សពេញវ័យដែលមានហានិភ័យខ្ពស់។

វាជាថ្នាំប្រឆាំងមេរោគដំបូងគេ ដែលអាចមានប្រសិទ្ធភាពប្រឆាំងនឹងវីរុសបំប្លែងខ្លួនដ៏ធំទូលាយរួមទាំងមេរោគ Omicron ដ៏កាចសាហាវផងដែរ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ អង់គ្លេស ទិញវ៉ាក់សាំងជាង ១០០លានដូសបន្ថែម ទុកចាក់ដូសទី៤ ទី៥ ដើម្បីប្រយុទ្ធជាមួយ Omicron