សម្តេចតេជោ៖ គ្មានការ​ដាក់​ប្រទេស​​ក្នុង​គ្រា​អាសន្ន​ ឬបិទរាជធានីភ្នំពេញទេ

ភ្នំពញ៖ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុនសែននៅយប់ថ្ងៃទី៦ខែធ្នូឆ្នាំ២០២០ បានធ្វើការបញ្ជាក់ច្បាស់ថានឹងមិនមានការស្នើសុំ ដាក់ប្រទេសក្នុងគ្រាមានអាសន្នឬចេញបទបញ្ជាបិទរាជធានីភ្នំពេញដូចការឃោសនាភូតកុហសរបស់ជនអាក្រក់នោះទេ។ ការបញ្ចាក់របស់ប្រមុខរាជរដ្ឋាភិបាល ធ្វើឡើងបន្ទាប់ពីមានការឃោសនាភូតកុហកថានឹងមានការបិទប្រទេសទាំងមូលឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះហើយបំផុសឱ្យមនុស្សទិញទំនិញត្រៀមទុក។

សម្តេចតេជោនាយករដ្ឋមន្រ្តីបានមានប្រសាសន៍ថា៖«ព្រឹកមិញខ្ញុំបាននិយាយដល់ការត្រៀមបំរុងទុកនូវលិខិតនានាដើម្បីនឹងសុំព្រះរាជក្រឹត្យដាក់ប្រទេសក្នុងគ្រា មានអាសន្ន ។ក្នុងពេលជាមួយគ្នាខ្ញុំក៏បានបញ្ជាក់ថាខ្ញុំមិនចង់ទៅដល់ចំណុចនេះទេ ព្រោះវាប៉ះពាល់ធំពេកដល់សេដ្ឋកិច្ចនិងជីវភាពប្រជាជនដែលខ្ញុំស្នើសុំឱ្យមាន ការចូលរួមពីប្រជាជនដើម្បីប្រយុទ្ធប្រឆាំងជាមួយកូវីដ១៩ជំនួសវិញ»។

សម្តេចតេជោបន្តទៀតថា«ពេញមួយថ្ងៃនេះការបំភ្លើសនានាបានកើតឡើងថានឹងមានការបិទប្រទេសឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះហើយបំផុសឱ្យមនុស្សទិញទំនិញត្រៀមទុក។ចំពោះមុខពាក្យភូតកុហកបែបនេះក្នុងឋានៈខ្ញុំជាប្រមុខនៃរាជរដ្ឋាភិបាលខ្ញុំសូមបញ្ជាក់ជូនថានឹងមិនមានការស្នើសុំដាក់ប្រទេសក្នុងគ្រាមានអាសន្នទាំងមូលឬមួយផ្នែកណានោះឡើយហើយក៏នឹងមិនមានការចេញបទបញ្ជាឱ្យបិទរាជធានីភ្នំពេញដូចការឃោសនាភូតកុហក់របស់ជនអាក្រក់នោះដែរ»។

សម្តេចតេជោ ហ៊ុន សែន បានបន្តធ្វើការអំពាវនាវទៅកាន់ជនរួមជាតិ បន្ត​ភាព​ស្ងប់ស្ងាត់កុំភ័យស្លន់ស្លោនិងសូមចូលរួមជាមួយរាជរដ្ឋាភិបាលក្នុងការប្រយុទ្ធប្រឆាំងជាមួយកូវីដ១៩តាមការណែនាំរបស់ក្រសួងសុខាភិបាល៕

ដោយ៖ណារី