ព័ត៌មានជាតិ

លទ្ធផលប្រឡងឌីប្លូមឆ្នាំនេះ ប្រកាសតាមអនឡាញវិញ ដើម្បីទប់ស្កាត់ការឆ្លងកូវីដ១៩

បានផុស

៦ years មុន

នៅ

ថ្ងៃចន្ទ ៧ ធ្នូ ២០២០

ដោយ

ភ្នំពេញ ៖ ដើម្បីការពារការឆ្លងរីករាលដាលចូលទៅសហគមន៍ទ្រង់ទ្រាយធំនោះបានតម្រូវឲ្យសាលានីមួយៗប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឬឌីប្លូម នៅថ្ងៃទី៧ ខែធ្នូ ឆ្នាំ២០២០នេះ តាមរយៈប្រព័ន្ធតេឡេក្រាមជំនួសឲ្យសិស្សទៅមើលផ្ទាល់នៅតាមសាលារៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក លឹមចន្ថា នាយកវិទ្យាល័យចំណេះទូទៅនិងបច្ចេកទេសហ៊ុនសែនជម្ពូវ័នបានឲ្យដឹងនៅរសៀលថ្ងៃទី៧ធ្នូនេះថា «តាមការណែនាំពីមន្ទីរអប់រំរាជធានីភ្នំពេញគឺលទ្ធផលប្រឡងឆ្នាំនេះត្រូវប្រកាសតាមរយៈប្រព័ន្ធតេឡេក្រាមដោយបាញ់ចូលទៅក្នុងគ្រុបរបស់សិស្សតែម្តងដោយមិនចាំបាច់ឲ្យសិស្សមកមើលលទ្ធផលនៅសាលាទេដោយសារខ្លាចការឆ្លងជំងឺកូវីដ១៩»។

លោកនាយកសាលាបានបន្តថា នៅឆ្នាំនេះវិទ្យាល័យរបស់លោកក៏ដូចជាសាលាផ្សេងៗទៀតនៅក្នុងរាជធានីភ្នំពេញនៅតែរក្សាបានអត្រាសិស្សប្រឡងជាប់ជាង៩០ភាគរយដូចឆ្នាំមុនៗដែរលើកលែងតែអនុវិទ្យាល័យពោធិចិនតុងទេដែលមានសិស្សប្រឡងជាប់ជាង៨០ភាគរយ។

លោកបានបន្ថែមថា សាលាក៏បានបិទលទ្ធផលប្រឡងនៅតាមក្តាខៀននីមួយៗតែរក្សាគម្លាតនៅពេលដែលមានសិស្សឬអាណាព្យាបាលមកមើល។ប៉ុន្តែមានសិស្ស ឬ អាណាព្យាបាលតិចតួចប៉ុណ្ណោះដែលមកមើលឈ្មោះប្រឡងដោយសារពួកគាត់ខ្លាចជំងឺកូវីដ១៩។

ចំណែក កញ្ញា អេងលាងរៀននៅវិទ្យាល័យព្រែកដំបូកស្រុកស្រីសន្ធរខេត្តកំពង់ចាមបានប្រឡងជាប់ឌីប្លូមបានលើកឡើងថា «នៅសាលារបស់ខ្ញុំក៏គ្រូបានបាញ់លទ្ធផលប្រឡងចូលតាមគ្រុបសិស្សដូចនៅភ្នំពេញអីចឹងដែរ»។

កញ្ញាអេងលាងបានបន្តថា ការធ្វើបែបនេះវាងាយស្រួលដល់សិស្សដោយមិនចាំបាច់ចំណាយពេលវេលាទៅមើលលទ្ធផលប្រឡងនៅតាមសាលាទេពិសេសកាត់បន្ថយហានិភ័យនៃការចម្លងជំងឺកូវីដ១៩ដោយសារចំនួនសិស្សនៅតាមសាលានីមួយៗច្រើន។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡាបានឲ្យដឹងថា ក្រសួងនៅមិនទាន់បានដឹងលទ្ធផលសរុបនៃចំនួនបេក្ខជនប្រឡងជាប់ប៉ុន្មាននិងធ្លាក់ប៉ុន្មាននោះទេដោយសារការប្រឡងឌីប្លូមខុសពីបាក់ឌុប។

លោកបានបន្តថា«បើប្រឡងបាក់ឌុបលទ្ធផលដឹងនៅថ្ងៃតែមួយបានតែប្រឡងឌីប្លូមវិញសាលានីមួយៗជាអ្នករៀបចំដោយខ្លួនឯងហើយការប្រកាសលទ្ធផលក៏ទៅតាមសាលារៀងៗខ្លួនប៉ុន្តែក្រសួងនៅមិនទាន់មានលទ្ធផលនៅក្នុងដៃនៅឡើយទេដោយក្រសួងណែនាំឲ្យតាមសាលានីមួយៗធ្វើយ៉ាងណាបញ្ជួនលទ្ធផលមកឲ្យក្រសួងឲ្យបានត្រឹមថ្ងៃទី១៤ធ្នូខាងមុខនេះ»។

គួរបញ្ជាក់ថា ប្រឡងឌីប្លូមនៅឆ្នាំនេះបានប្រព្រឹត្តិទៅនៅថ្ងៃទី៣០ខែវិច្ឆិកានិងថ្ងៃទី១ធ្នូឆ្នាំ២០២០ដោយមានបេក្ខជនសរុបចំនួន១៥៨៧១៧នាក់ស្រី៨៥១៣១នាក់និងមានមណ្ឌលប្រឡងចំនួន១៧២៩ចែកជា៧១៤១បន្ទប់៕
ដោយ ៖ សំអឿន

Related Topics:

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា