ព័ត៌មានជាតិ

ថៅកែទឹកស្អាតម្នាក់ ចាក់ដីរំលោភបឹងអូរតុំ ក្នុងក្រុងដូនកែវ ធ្វើជាកម្មសិទ្ធិផ្ទាល់ខ្លួន

បានផុស

៤ years មុន

នៅ

ថ្ងៃសុក្រ ៤ កុម្ភៈ ២០២២

ដោយ

ដីបឹងអូរតុំ ស្ថិតនៅភូមិអូរតុំ សង្កាត់រកាក្រៅ ក្រុងដូនកែវ ខេត្តតាកែវ ត្រូវបានអ្នកមានលុយម្នាក់ចាក់ដីរំលោភយកធ្វើជាកម្មសិទ្ធិផ្ទាល់ខ្លួនរាប់សិបម៉ែត្រការ៉េ អាជ្ញាធរក្រុងនិងលោកប្រធានមន្ទីរធនធានទឹកមើលមិនឃើញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ខេត្តតាកែវ នៅតែមានអ្នកចាក់ដីរំលោភយកដីបឹងធម្មជាតិ បើទោះបីប្រមុខរាជរដ្ឋាភិបាលលោកបានធ្វើការប្រមានខ្លាំងៗនិងបានចាប់ខ្លួនអ្នកពាក់ព័ន្ធដែលរំលោភយកដីព្រៃលិចទឹក រំលោភយកដីបឹងធម្មជាតិជាបន្តបន្ទាប់នៅចុងឆ្នាំ២០២១កន្លងទៅនេះ ជាក់ស្តែងទីតាំងដីបឹងអូរតុំ ស្ថិតនៅសង្កាត់រកាក្រៅ ក្រុងដូនកែវ ខេត្តតាកែវ ដែលជាបឹងធម្មជាតិតាំងពីយូរ ត្រូវបានរួមតូច ព្រោះតែអ្នកមានលុយ មានអំណាចមួយចំនួនឃើញផលចំណេញលុយលើកគោក បាននាំគ្នាធ្វើសកម្មភាពចាក់ដីលុបយកដីបឹងរបស់រដ្ឋយក និងបានដាំដើមឈើធំៗ និងដើមចេកបន្លំភ្នែកពីដីថ្មី ឲ្យប្រែក្លាយជាដីចាស់មានចម្ការដើមចេកធំៗរួចជាស្រេច។

តាមប្រជាពលរដ្ឋរស់នៅតំបន់បឹងតុំ ដែលសុំមិនបញ្ចេញឈ្មោះបាននិយាយថា ដីបឹងតុំដែលលួចចាក់ដីលុបនិងដាំដើមឈើបន្លំភ្នែកនេះ គឺជាថៅកែទឹកស្អាតនៅឃុំស្រង៉ែ ស្រុកទ្រាំង ជាអ្នកចាក់ដីរំលោភយក ចឹងហើយបានជាលោកប្រធានមន្ទីរធន់ធានទឹកមើលមិនឃើញ។ ពួកគាត់បន្តថា អ្នកដែលចាក់ដីលុបយកបឹងតុំនេះបាន មិនមែនប្រជាពលរដ្ឋធម្មតាធ្វើបាននោះទេ ភាគច្រើនគឺអ្នកមានអំណាច អ្នកមានលុយ ឬមានខ្សែបណ្តោយជាមួយអាជ្ញាធរ ទើបអាចចាក់លុបយកដីបឹងធម្មជាតិនេះបាន។

លោក កង អាណាន់ អភិបាលក្រុងដូនកែវ បានឲ្យដឹងកាលពីថ្ងៃទី០៣ ខែកុម្ភៈ ឆ្នាំ២០២២នេះថា លោកនៅមិនទាន់ទទួលបានព័ត៌មានចំពោះការចាក់ដីលុបបឹងតុំខាងលើនេះទេ ហើយលោកនឹងចុះទៅពិនិត្យលើការលើកឡើងខាងលើនេះ ចំពោះប្រជាពលរដ្ឋដែលពាក់ព័ន្ធជាមួយនឹងអ្នកដែលចាក់ដីលុបបឹងតុំ ដែលជាបឹងធម្មជាតិរបស់រដ្ឋ។

ដោយឡែកលោក ប៉ុន ហ៊ួរ ប្រធានមន្ទីរធនធានទឹកនិងឧតុនិយមខេត្តតាកែវ បានឲ្យដឹងដែរថា ករណីចាក់ដីរំលោភយកដីបឹងតុំនេះ លោកនឹងចុះពិនិត្យ ហើយនឹងផ្តល់ព័ត៌មានមកវិញពីបញ្ហានេះ។ តែលោកប្រធានមន្ទីរក៏បានបញ្ជាក់ផងដែរថា ចំពោះការចាក់ដីលុបបឹងតុំនេះ ឮថាអ្នកចាក់ដីលុបប្រើរូបភាពលួចចាក់ដីលុបបឹងនៅពេលយប់៕

អត្ថបទ៖ វីរៈ