ភាពយន្តដីឥដ្ឋកម្ពុជា ទទួលបានរង្វាន់ខ្លាឃ្មុំប្រាក់ ពីមហោស្រពភាពយន្តអន្តរជាតិ​ក្រុង​ប៊ែរឡាំង

ផលិតករភាពយន្តកម្ពុជា លោក ប៉ាន់ រិទ្ធី បានប្រកាសលើបណ្ដាញសង្គម Facebook នៅព្រឹកថ្ងៃទី១៧ ខែកុម្ភៈនេះថា ភាពយន្តរបស់លោករឿង អ្វីគ្រប់យ៉ាងនឹងមិនអីទេ (Everything will be Ok) ទទួលបាន​ រង្វាន់​ខ្លាឃ្មុំប្រាក់ សម្រាប់​ស្នាដៃសិល្បៈ ​ក្នុងមហោស្រពភាពយន្តអន្តរជាតិ​ក្រុង​ប៊ែរឡាំង ​លើកទី​៧២ ដែលរៀបចំ​ពីថ្ងៃទី ១០ ដល់ទី ២០ កុម្ភៈ ​នៅ​ទីក្រុង​ប៊ែរឡាំង ប្រទេស​អាល្លឺម៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿង Everything will be Ok ជាភាពយន្តច្នៃថ្មី ដែលប្រើដីឥដ្ឋឆ្លាក់ចេញជាតួអង្គ និងសម្ភារៈរួមផ្សំដទៃ ដើម្បីផ្គុំចេញជាសាច់រឿង។

លោក ប៉ាន់ រិទ្ធី បានបង្ហាញពីមូលហេតុនៃការផលិតភាពនេះថា ដោយសារ បញ្ហាកូវីដ នៅឆ្នាំ ២០២០ បានធ្វើឱ្យទីក្រុងធំៗជាច្រើនលើពិភពលោកមានដូចជា ប៉ារីស អេស្បាញ ក៏ដូចជាសង្កាត់ខ្លះនៅប្រទេសកម្ពុជា បានហាមឃាត់មិនឱ្យមនុស្សចេញក្រៅផ្ទះ។

លោក ប៉ាន់ រិទ្ធី មានប្រសាសន៍បន្តថា៖ “ពេលយើងឃើញទីក្រុងអត់មានមនុស្សដើរអ៊ីចឹង ខ្ញុំនឹកឃើញសម័យខ្មែរក្រហម ពេលខ្មែរក្រហមចូលទីក្រុងភ្នំពេញ គេឱ្យមនុស្សចេញក្រៅទីក្រុងអស់។ ទីក្រុងស្ងាត់ គឺអស់មនុស្សមែនទែន តែនេះ [ការបិទខ្ទប់បង្ការកូវីដ] មនុស្សនៅហ្នឹង តែនៅក្នុងផ្ទះ។ ដល់យើងធ្វើបានឃើញអ៊ីចឹងទៅ យើងចេះតែស្រមើស្រមៃជំនាន់ហ្នឹងផ្សេងអ៊ីចឹងទៅ។ ហើយគិតថា គួរណាស់តែធ្វើកុនមួយ រឿងទីក្រុងអត់មនុស្សនៅ”។

គួរបញ្ជាក់គួរបញ្ជាក់ថា គួរបញ្ជាក់ថា លោក ប៉ាន់ រិទ្ធី គឺជាអ្នកដឹកនាំ និង អ្នកសរសេរអត្ថបទ ភាពយន្តបែបឯកសារជនជាតិខ្មែរម្នាក់ដែលត្រូវបានគេទទួលស្គាល់ជាអន្តរជាតិ។ ស្នាដៃភាពយន្តរបស់លោកមានដូចជា សាយធូ (១៩៨៩) កម្ពុជា៖ ចន្លោះសង្គ្រាម និងសន្តិភាព (១៩៩១) អ្នកស្រែ (១៩៩៤) បុប្ផាណា សោកនាដកម្មមួយ (១៩៩៦) រាត្រីមួយក្រោយសង្គ្រាម (១៩៩៨) ទឹកដីវិញ្ញាណវិលវល់ (២០០០) Que la barque se brise, que la jonque s’entrouvre (២០០១) ស២១ ម៉ាស៊ីនពិឃាដ (២០០៣) មនុស្សអង្គរ (២០០៣) មហោស្រពដែលឆេះ (២០០៥) ក្រដាសមិនអាចខ្ចប់ភ្លើង (២០០៧) ជញ្ជាំងសមុទ្រ (២០០៨) រូបភាពដែលបាត់បង់ (២០១៣)៕

អត្ថបទ៖ ច័ន្ទ ​វីរៈ