តម្លៃប្រេងអន្តរជាតិ​​ហក់ឡើងខ្ពស់បំផុតរាប់តាំងពីជម្លោះផ្ទុះឡើង លើស ១២០ ដុល្លារ/បារ៉ែល

តម្លៃប្រេងអន្តរជាតិ​បាន​បន្តហក់ឡើង​កប់ពពកនៅថ្ងៃព្រហស្បតិ៍ (៣០ មេសា) នេះ​ ដល់កម្រិតខ្ពស់បំផុតរាប់ចាប់តាំងពីជម្លោះសហរដ្ឋ​អាមេរិក និងអ៊ីរ៉ង់់ផ្ទុះឡើង ដោយ​លើស ១២០ ដុល្លារ/បារ៉ែល ក្រោយមាន​របាយការណ៍ថា ប្រធានាធិបតីអាមេរិក ដូណាល់ ត្រាំ ​បញ្ជាឱ្យត្រៀមបង្កើនការបិទខ្ទប់កំពង់ផែអ៊ីរ៉ង់​។

តម្លៃប្រេង​ឆៅ​​ម៉ាក Brent សម្រាប់កុងត្រាខែមិថុនាដែលត្រូវបិទបញ្ចប់នៅថ្ងៃព្រហស្បតិ៍នេះ បាន​កើនឡើង ១,៩៦% ដល់ ១២០ ដុល្លារ/បារ៉ែល ដែលជាកំណើនតម្លៃ ៩ ថ្ងៃជាប់ៗគ្នា ខណៈតម្លៃប្រេងឆៅអាមេរិក WTI បាន​កើន ០,២% ដល់ ១០៧,០៩ ដុល្លារ/បារ៉ែល។

​ពេលបិទការជួញដូរកាលពីថ្ងៃពុធ តម្លៃប្រេង Brent ​​បាន​ហក់ឡើង ៦% ​និង WTI ​បាន​ហក់ឡើង 7% ហើយ​មានពេលមួយក្នុងការជួញដូរ​នាថ្ងៃដដែល​ តម្លៃ Brent បាន​លោតដល់ ១២២ ដុល្លារ/បារ៉ែល ដែលជាកម្រិតខ្ពស់បំផុតរាប់តាំងពីពាក់កណ្ដាលឆ្នាំ ២០២២។

តាមការចុះផ្សាយរបស់បណ្ដាញព័ត៌មាន CNBC កំណើនតម្លៃឥឡូវនេះ កើតឡើងក្រោយមាន​សេចក្ដីរាយករណ៍នៅថ្ងៃពុធ​ថា លោក ត្រាំ បាន​ច្រានចោលសំណើរបស់អ៊ីរ៉ង់ដើម្បីបើកច្រកសមុទ្រហ័រមូហ្សឡើងវិញ ដែលជាសញ្ញាថា អាមេរិក​នឹង​បន្តបិទខ្ទប់​នាវាចរណ៍ចេញចូលកំពង់ផែអ៊ីរ៉ង់ ខណៈកាសែត Wall Street Journal បាន​ផ្សាយថា ប្រធានាធិបតីដដែល បានបញ្ជាជំនួយយោធាបន្ថែមទៀត​ដើម្បីបង្កើនការបិទខ្ទប់អ៊ីរ៉ង់។ ​

លោក ត្រាំ ក៏បង្ហោះសារគំរាមកំហែងអ៊ីរ៉ង់​នៅលើបណ្ដាញសង្គម Truth Social កាលពីថ្ងៃពុធ ផងដែរ ដោយ​និយាយក្នុងន័យថា អ៊ីរ៉ង់​បាន​បរាជ័យលើកិច្ចព្រមព្រៀងបញ្ឈប់ការអភិវឌ្ឍនុយក្លេអ៊ែរ ហើយអ៊ីរ៉ង់ត្រូវតែព្រមព្រៀង បើមិនដូច្នោះទេ អ្វីៗនឹង​កាន់តែអាក្រក់សម្រាប់ពួកគេ។​ ​

ក្រៅពីនេះ មន្រ្តីសេតវិមានបាន​ឱ្យដឹងថា លោក ត្រាំ ​បាន​ពិភាក្សាជាមួយក្រុមហ៊ុនប្រេងអំពីរបៀបកាត់បន្ថយផលប៉ះពាល់នៃលទ្ធភាព​បិទផ្លូវកំពង់ផែអ៊ីរ៉ង់រយៈពេលជាច្រើនខែ ដែល​បង្កឱ្យមានការព្រួយបារម្ភ​ក្នុងទីផ្សារអំពីការរំខាន​ផ្នែក​ផ្គត់ផ្គង់ប្រេង​ដ៏អូសបន្លាយ។

ទន្ទឹមនឹង​ការបិទខ្ទប់របស់សហរដ្ឋអាមេរិក អ៊ីរ៉ង់ឯណោះវិញ​នៅតែបន្តបិទខ្ទប់ច្រកសមុទ្រហ័រមូហ្សសម្រាប់កប៉ាល់ដឹកជញ្ជូនមួយភាគធំ ដែលធ្វើឱ្យលំហូរប្រេងចេញពីមជ្ឈិមបូព៌ានៅតែបន្តជាប់គាំង ហើយជំរុញឱ្យអ្នកវិភាគព្យាករពីកំណើន​តម្លៃប្រេងអន្តរជាតិបន្ថែមទៀត៕