មន្ទីរវប្បធម៌ខេត្តកំពង់ស្ពឺ រៀបចំប្រណាំងរទេះសាឡីគោលឿនឡើងវិញ

លោក ស៊ុន មានជ័យ ប្រធាន​មន្ទីវប្បធម៌ និងវិចិត្រសិល្បៈខេត្តកំពង់ស្ពឺ បានឱ្យដឹងថា ដោយបានការអនុញ្ញាតជាគោលការណ៍ពីរដ្ឋបាលសាលាខេត្តកំពង់ស្ពឺ មន្ទីរវប្បធម៌ និងវិចិត្រសិល្បៈ បានសហការជាមួយសហភាពសហព័ន្ធយុវជនកម្ពុជា (ស.ស.យ.ក.) ខេត្តកំពង់ស្ពឺ និងសមាគមគោខេត្តកំពង់ស្ពឺ នឹងរៀបចំពិធីប្រណាំងរទេះសាឡីគោលឿនឡើងវិញ នៅថ្ងៃទី៣ ខែមេសា ឆ្នាំ២០២២នេះ នៅភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ។

លោក ស៊ុន មានជ័យ បានឱ្យ “កម្ពុជាថ្មី” ដឹងនៅរសៀលថ្ងៃទី១ ខែមេសា ឆ្នាំ២០២២ នេះថា ការរៀបចំប្រណាំងរទេះសាឡីគោលឿនឡើងវិញនេះ បន្ទាប់ពីខកខានអស់រយៈពេលពីរឆ្នាំ កាលពីឆ្នាំ ២០២០ និងឆ្នាំ២០២១ ដោយសារតែការរីករាលដាលនៃជំងឺកូវីដ-១៩។

លោក ស៊ុន មានជ័យ បានឱ្យដឹងបន្តថា ដើមឡើយ សមាគមគោខេត្តកំពង់ស្ពឺ តែងណាត់គ្នាប្រណាំងរទេះសាឡីគោកម្សាន្តនាឱកាសមុនពិធីបុណ្យចូលឆ្នាំ មិនមែនជាការភ្នាល់ប្រាក់អ្វីនោះទេ។ ដោយឃើញសារៈសំខាន់ អាចជាប្រពៃណី និង​ដើម្បីទាក់ទាញទេសចរជាតិ អន្តរជាតិទៀតនោះ មន្ទីរវប្បធម៌ សហការជាមួយ ស.ស.យ.ក បានរៀបចំការប្រណាំងនេះ កាន់តែអធិកអធម ដោយមានផ្ដល់ជា ជយលាភី ប័ណ្ណសរសើរ និងថវិកាអមមួយចំនួន។

ប្រធានមន្ទីរវប្បធម៌ និងវិចិត្រសិល្បៈខេត្តកំពង់ស្ពឺ បញ្ជាក់ថា មន្ទីរបានសហការជាមួយនឹងសមាគមគោកំពង់ស្ពឺរៀបចំការប្រណាំងរទេះសាឡីគោលឿនេះបានចំនួន ៧ លើករួចមកហើយ។ ក្នុងឱកាស ពិធីប្រណាំងឡើងវិញនេះ លោកសូមអញ្ជើញសាធារណជនចូលរួមទស្សនាកម្សាន្តដោយរីករាយ និងប្រកបដោយការអនុវត្តវិធានការ ៣កុំ ៣ការពារ ដើម្បីបង្ការការឆ្លងជំងឺកូវីដ-១៩៕

អត្ថបទ៖ ច័ន្ទ វីរៈ