លោកជំទាវ ម៉ែន សំអន សំណូមពរដល់កម្មករ-កម្មការិនី ត្រូវរក្សាជំហរការងារឲ្យបានល្អ ជៀសវៀងការធ្វើបាតុកម្ម និងកូដកម្ម

លោកជំទាវ ម៉ែន សំអន អនុប្រធានគណបក្សប្រជាជនកម្ពុជា បានសំណូមពរដល់កម្មករ-កម្មការិនី ត្រូវរក្សាជំហរការងារឲ្យបានល្អ ជៀសវៀងការធ្វើបាតុកម្ម និងកូដកម្ម ដែលធ្វើឲ្យប៉ះពាល់ដល់ការវិនិយោគ និងការអភិវឌ្ឍប្រទេសជាតិ។ លោកជំទាវ ម៉ែន សំអន បានសំណូមពរបែបនេះ ខណៈពេលអញ្ជើញជួបសំណេះសំណាល ជាមួយកម្មករ-កម្មការិនី ៥៣០នាក់ នៅរោងចក្រផលិតកង XDS Bicycle Cambodia Co ltd ស្ថិតក្នុងបំបន់សេដ្ឋកិច្ចពិសេស ឈីលូ ជានពូចាយ នៅព្រឹកថ្ងៃទី ១ ខែឧសភា ឆ្នាំ ២០២២ ស្ថិតក្នុងសង្កាត់ស្វាយតឿ ខេត្តស្វាយរៀង។

ក្នុងថ្ងៃនេះផងដែរតំណាងកម្មករ-កម្មការិនី ក៏បានគោរពថ្លែងអំណរគុណ ចំពោះសម្តេចតេជោនាយករដ្ឋមន្ត្រី ដែលបានខិតខំស្វែងរកវ៉ាក់សាំង មកចាក់ជូនប្រជាពលរដ្ឋកម្ពុជា ក៏ដូចជាកម្មករ-កម្មការិនី និងបានទទួលបាននូវប្រាក់ខែសមរម្យ លក្ខណ្ឌការងារល្អ និងមានការយកចិត្តទុក្ខដាក់ពីថៅកែ ផងដែរ។  

លោកជំទាវ ក៏បានអានទាំងស្រុង នូវសារលិខិតលេខ ០១ សលខ របស់រាជរដ្ឋាភិបាលកម្ពុជា ស្តីពី សារលិខិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសខួបអានុស្សាវរីយ៍លើកទី ១៣៦ ទិវាពលកម្មអន្តរជាតិ ១ ឧសភា ឆ្នាំ ២០២២ ក្រោមប្រធានបទ «សន្តិភាព សុខភាព និងសន្តិសុខការងារ» ជូនដល់អង្គពិធីទាំងមូល និងបានណែនាំឲ្យកម្មករ-កម្មការិនី ធ្វើការពិនិត្យបញ្ជីឈ្មោះបោះឆ្នោត និងត្រៀមលក្ខណៈសម្បតិ្តគ្រប់យ៉ាង សម្រាប់យកទៅបោះឆ្នោត ជាពិសេសអត្តសញ្ញាណប័ណ្ណ និងបោះឆ្នោតជូនគណបក្សប្រជាជនកម្ពុជា ឲ្យបានគ្រប់ៗគ្នា និងបានស្នើឲ្យកម្មករ-កម្មការិនី ត្រូវរក្សាជំហរការងារឲ្យបានល្អ ជៀសវៀងការធ្វើបាតុកម្ម និងកូដកម្ម ដែលនាំឲ្យបាត់បង់ផលប្រយោជណ៍រួម ដែលធ្វើឲ្យប៉ះពាល់ដល់ការវិនិយោគ ការអភិវឌ្ឍន៍ប្រទេសជាតិ។

នាឪកាសនោះ លោកជំទាវ ម៉ែន សំអន ក៏បាននាំមកអំណោយ ចែកជូនសម្រាប់កម្មករ-កម្មការិនីចំនួន ៥០២នាក់ ក្នុងម្នាក់ៗទទួលបានថវិកា ២ម៉ឺនរៀល និងសារ៉ុង ១។ ចំណែក ស្ត្រីមានផ្ទៃពោះចំនួន ៣៨នាក់ ក្នុងម្នាក់ៗ ទទួលបានសារ៉ុង ១ និងថវិកា ៤ម៉ឺនរៀល ផងដែរ៕

អត្ថបទ៖ វិមាន