ជម្រើសជាតិកម្ពុជាស្ថិតនៅ Pot ទី៤ ចាប់​ពូល​ពាន​ជើងឯកអាស៊ាន (AFF Cup)

ក្រុមបាល់ទាត់ជម្រើសជាតិកម្ពុជា នឹងស្ថិតនៅប្រអប់ទី៤ នៃការចាប់ពូលពានរង្វាន់ជើងឯកតំបន់អាស៊ីអាគ្នេយ៍ ឆ្នាំ​២០២២ (AFF Mitsubishi Electric Cup 2022) ឬគេស្គាល់ពីមុនមកថា AFF Suzuki Cup ដែលគ្រោងធ្វើពិធីចាប់ពូលនៃសប្ដាហ៍ក្រោយ ថ្ងៃទី៣០ ខែសីហា នាទីក្រុងបាងកក ប្រទេសថៃ។

AFF Mitsubishi Electric Cup 2022 នឹងឃើញក្រុមដែលមានសមត្ថភាពចំនួន១០ ប្រកួតប្រជែងដណ្តើមពានដែលគ្រប់គ្នាចង់បានបំផុតនៅក្នុងបាល់ទាត់អាស៊ាន។ ចូលដល់ការប្រកួតលើកទី១៤ របស់ខ្លួន ការប្រកួតនៅឆ្នាំនេះ នឹងត្រលប់មកលេងទម្រង់ (ក្នុងដី និងក្រៅដី) ពេញលេញវិញផងដែរ បន្ទាប់ពីលើកចុងក្រោយពុំត្រូវបានប្រើរូបមន្តនេះដោយសារ​វិបត្តកូវីដ-១៩។

កម្ពុជាស្ថិតនៅប្រអប់ទី៤ ដោយអាស្រ័យលើសមិទ្ធផល ២លើកចុងក្រោយ (២០១៨, ២០២០ លើកមកលេងចុងឆ្នាំ​២០២១) ឈរនៅលេខ ៤ ក្នុងពូល។ ដោយឡែកប្រអប់ ៥ ទៀតរួមមាន ប្រអប់ទី១ វៀតណាម, ថៃ។ ប្រអប់ទី២ ម៉ាឡេស៊ី, ឥណ្ឌូនេស៊ី។ ប្រអប់ទី៣ ហ្វីលីពីន, សិង្ហបុរី។ ប្រអប់ទី៤ កម្ពុជា, មីយ៉ាន់ម៉ា និងប្រអប់ទី៥ ឡាវ បូករួមជាមួយក្រុមឈ្នះវគ្គជម្រុះរវាង ទីម័រខាងកើត ឬក៏ ព្រុយណេ។

ចំពោះការចាប់ឆ្នោតជាផ្លូវការ នឹងបែងចែកជា ២ ពូល ក្នុងមួយពូលមាន ៥ក្រុម ដោយក្រុមនីមួយៗលេង ២ប្រកួតក្នុងដី និង២ប្រកួតក្រៅដី។

បន្ទាប់មកក្រុមកំពូលទាំងពីរ នៃពូលនីមួយៗនឹងឈានទៅវគ្គជម្រុះចាញ់ធ្លាក់ ដែលមាន២ជើង គឺវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។ តាមគម្រោងពានរង្វាន់នេះនឹងចាប់ផ្ដើមពីថ្ងៃទី២២ ខែធ្នូ ឆ្នាំ២០២២ ហើយនឹងបញ្ចប់នៅថ្ងៃទី២២ ខែមករា ឆ្នាំ២០២៣៕

អត្ថបទ៖ មន្នីរ័ត្ន