ព័ត៌មានបន្ថែម ករណីអគ្គិភ័យឆេះក្លឹបនៅជិតរង្វង់មូលផ្សារដើមថ្កូវ

អគ្គិភ័យដែលឆេះក្លឹបកម្សាន្ដមួយកន្លែងនៅជិតរង្វង់មូលផ្សារដើមថ្កូវ ដែលមានយីហោ all friend pub បានធ្វើឲ្យខូចខាតក្លឹបស្ទើរទាំងស្រុង និងរាលដាលដល់ផ្ទះពលរដ្ឋផងដែរ។

ករណីគ្រោះអគ្គិភ័យនេះ បានកើតឡើងនៅវេលាម៉ោង១០និង៤០នាទី ថ្ងៃទី១ ខែកញ្ញា ឆ្នាំ២០២២ នៅចំណុចក្លឹប all friend pub តាមបណ្ដោយផ្លូវលេខ៤៨៨ មូលដ្ឋានសង្កាត់ ផ្សារដើមថ្កូវ ខណ្ឌចំការមន រាជធានីភ្នំពេញ។

ប្រជាពលរដ្ឋរស់នៅជិតទីតាំងកើតហេតុបានឲ្យដឹងថា នៅមុនពេលកើតហេតុគេឃើញមានផ្សែងហ៊ុយចេញពីទីតាំងក្លឹប​ក៏បាននាំគ្នាយក​បំពង់ពន្លត់អគ្គិភ័យជួយបាញ់ពន្លត់ តែដោយការឆាបឆេះខ្លាំងមិនអាចគ្រប់គ្រងបាន ក៏រាយការណ៍ទៅអាជ្ញាធរមូលដ្ឋានដើម្បីទំនាក់ទំនងទៅ​កម្លាំងសមត្ថកិច្ចជំនាញចេញជួយអន្តរាគមន៍។

លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ដោយទទួលបានព័ត៌មាន និងសេចក្ដីរាយការណ៍មានអគ្គិភ័យកំពុងឆាបឆេះភ្លាមៗនោះ​លោកក៏បានបញ្ជាឲ្យរថយន្តពន្លត់​អគ្គិភ័យរបស់ស្នងការដ្ឋាននគរបាលរាជធានីភ្នំពេញ គ្រប់គោលដៅទាំងអស់ដើម្បីចេញជួយអន្តរាគមន៍ជួយឲ្យទាន់ពេលវេលា។ ប៉ុន្តែដោយទំហំនៃការឆាបឆេះធំ និងលឿនកម្លាំងជំនាញបានបាញ់ពន្លត់ភ្លាមៗដែរ តែការខូចខាតសម្ភារៈក្នុងក្លឹប អស់ស្ទើទាំងស្រុង ព្រោះជាប្រភេទ តុ សាឡុង ពូក..ជាដើម ។ និងបានរាលដាលដល់ផ្ទះពលរដ្ឋ ដែលនៅជាប់ជាក្លឹបនោះផងដែរដែលជាប្រភេទ​ឈើប្រកក្បឿង។

លោកនាយការិយាល័យបានបន្ថែមថា ក្នុងរង្វង់ប្រតិបត្តិការនេះ កម្មាំងជំនាញបានប្រើប្រាស់រថយន្តសរុប25គ្រឿង រួមមាន ទីក្រុងជ្រោយចង្វារ ក្រសួងមហាផ្ទៃ ទីក្រុងកោះពេជ្រ ស្រាបៀកម្ពុជា ស្នងការនគរបាលរាជធានីភ្នំពេញ និងប្រើប្រាស់រយះពេល​ជាង១ម៉ោងបាញ់ទឹកពន្លត់ជាស្ថាពរ។

ចំពោះមូលដ្ឋាននៃការឆាបឆេះ កម្លាំងជំនាញសន្និដ្ឋានជំហ៊ានដំបូងអាចបណ្ដាលមកពីឆ្លងចរន្តអគ្គីសនី តែយ៉ាងណាកម្លាំង​និងធ្វើការស្រាវជ្រាវបន្ថែម៕