ចិន ជួបគ្រោះរញ្ជួយដីកម្រិត ៦.៦រ៉ិចទ័រ 

ក្រុមស្ទាបស្ទង់ភូមិសាស្ត្រអាមេរិក (USGS) បានឲ្យដឹងថា​ គ្រោះរញ្ជួយដីកម្រិត ៦.៦រ៉ិចទ័រ បានវាយប្រហារភាគនិរតីប្រទេសចិន នៅថ្ងៃចន្ទទី៥ ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម USGS, គ្រោះរញ្ជួយដីនេះ បានវាយប្រហារនៅចម្ងាយប្រហែល ៤៣ គីឡូម៉ែត្រភាគអាគ្នេយ៍នៃទីក្រុង Kangding ក្នុងខេត្ត ស៊ីឈួន មានជម្រៅ ១០ គីឡូម៉ែត្រ។

មិន​ទាន់​មាន​សេចក្តី​រាយការណ៍​ភ្លាមៗ ​អំពី​អ្នក​ស្លាប់​និង​របួស​​ឡើយ។

អ្នកស្រុកបានប្រាប់ AFP ថា ការរង្គើបានរាលដាលទៅដល់ទីក្រុង Chengdu នៅក្បែរនោះ ដែលបច្ចុប្បន្នស្ថិតនៅក្រោមការបិទខ្ទប់កូវីដ១៩ រួមទាំងទីក្រុង Chongqing ផងដែរ។

ការរញ្ជួយដី គឺជារឿងធម្មតាក្នុងប្រទេសចិន ជាពិសេសនៅតំបន់ភាគនិរតីនៃប្រទេសនេះ។

ការរញ្ជួយដីកម្រិត ៨.០ រ៉ិចទ័រនៅតំបន់ Wenchuan នៃខេត្ត ស៊ីឈួន ក្នុងឆ្នាំ២០០៨ បានបណ្តាលឲ្យមនុស្សរាប់ម៉ឺននាក់បាត់បង់ជីវិត និងបង្កការខូចខាតយ៉ាងធំសម្បើម។

ដោយឡែក មនុស្ស៤នាក់បានស្លាប់ និងរាប់សិបនាក់ទៀតរងរបួស បន្ទាប់ពីការរញ្ជួយដីចំនួនពីរលើក បានវាយប្រហារភាគនិរតីប្រទេសចិនកាលពីខែមិថុនា៕

ប្រែសម្រួល៖ Vann Vann

ប្រភព៖ CNA

ចុចអាន៖ ហ្វីលីពីន បង្ហាញចំនួនអ្នកស្លាប់ និងរបួស ក្រោយរងការរញ្ជួយដីខ្លាំងក្លា (មានវីដេអូ)