ព្រឹទ្ធសភាអាមេរិក ចាត់វិធានការដំបូង ដើម្បីផ្តល់ជំនួយយោធាដោយផ្ទាល់ ទៅឲ្យ តៃវ៉ាន់ (មានវីដេអូ)

គណៈកម្មាធិការព្រឹទ្ធសភាអាមេរិក បានចាត់វិធានការដំបូងកាលពីថ្ងៃពុធទី១៤ខែកញ្ញា ឲ្យទីក្រុងវ៉ាស៊ីនតោន ផ្តល់ជំនួយយោធាក្នុងទំហំទឹកប្រាក់រាប់ពាន់លានដុល្លារដល់តៃវ៉ាន់ដោយផ្ទាល់ និងធ្វើឲ្យទំនាក់ទំនងកាន់តែផ្លូវការ ដោយបង្កើនការគាំទ្របន្ទាប់ពីភាពតានតឹងកើនឡើងខ្លាំងជាមួយទីក្រុងប៉េកាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អស់រយៈពេលជាច្រើនទសវត្សរ៍មកហើយ សហរដ្ឋអាមេរិកបានលក់សព្វាវុធទៅឲ្យតៃវ៉ាន់ ប៉ុន្តែច្បាប់ថ្មីនឹងកាន់តែបោះជំហានធំជាងមុន ពោលគឺអាមេរិកនឹងផ្តល់ជំនួយផ្នែកសន្តិសុខក្នុងទំហំទឹកប្រាក់ ៤.៥ពាន់លានដុល្លារក្នុងរយៈពេល៤ឆ្នាំ ដែលប្រាកដណាស់ វិធានការនេះនឹងធ្វើឲ្យទីក្រុងប៉េកាំងខឹងសម្បា។ អាមេរិក​ក៏នឹង​ដាក់​ទណ្ឌកម្ម​លើ​ចិនផង​ដែរ ប្រសិនបើក្រុងប៉េកាំង ​ប្រើ​កម្លាំង​ដើម្បី​ព្យាយាម​ដណ្តើម​យក​កោះតៃវ៉ាន់។

ដោយមានការគាំទ្រពីគណបក្សទាំងពីរ គណៈកម្មាធិការទំនាក់ទំនងការបរទេសព្រឹទ្ធសភា បានគាំទ្រច្បាប់គោលនយោបាយតៃវ៉ាន់ ដែលគេចាត់ទុកថាជាការធ្វើឲ្យប្រសើរឡើងនូវទំនាក់ទំនងដ៏ខ្លាំងក្លាបំផុត ចាប់តាំងពីសហរដ្ឋអាមេរិក បង្វែរការទទួលស្គាល់ពីទីក្រុងតៃប៉ិទៅទីក្រុងប៉េកាំងក្នុងឆ្នាំ ១៩៧៩។

សមាជិកសភាបានបង្ហាញការគាំទ្រចំពោះច្បាប់នេះ ចំពេលមានក្តីព្រួយបារម្ភកាន់តែខ្លាំងឡើងសម្រាប់កោះតៃវ៉ាន់ បន្ទាប់ពីរុស្ស៊ី លុកលុយអ៊ុយក្រែន និងបន្ទាប់ពីដំណើរទស្សនកិច្ចទៅកាន់ទីក្រុងតៃប៉ិ ដោយប្រធានសភាតំណាងរាស្រ្តអាមេរិក លោកស្រី Nancy Pelosi ដែលជាហេតុជំរុញឲ្យប្រទេសចិនរៀបចំសមយុទ្ធសង្រ្គាមធំៗ។

ទោះបីជាយ៉ាងណាក៏ដោយ សេចក្តីព្រាងច្បាប់នេះនៅតែត្រូវទទួលការពិនិត្យដោយព្រឹទ្ធសភា និងរដ្ឋសភា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ NDTV

ចុចអាន៖ ប្រភព៖ លោក បៃដិន គ្រោង ស្នើ សភាអាមេរិក ឲ្យ អនុម័ត លក់អាវុធ ក្នុងទំហំទឹកប្រាក់ ១.១ ពាន់ លាន ដុល្លារ ដល់ តៃវ៉ាន់