បង្ក្រាបទីតាំងអ៊ីធឺណេត AA2888 Net លួចបង្កប់ល្បែងស៊ីសង ឃាត់ខ្លួនមនុស្ស២នាក់

កម្លាំងគណៈបញ្ជាការឯកភាពខណ្ឌចំការមន ឆ្មក់បង្ក្រាបទីតាំង អ៊ីធឺណេតអនឡាញ ដែលមានស្លាកសញ្ញាសម្គាល់ AA2888.Net លួចបើកបង្កប់លេងល្បែងស៊ីសងភ្នាល់បាល់មួយកន្លែង  ឃាត់ខ្លួនមនុស្ស២នាក់ និងដកហូតវត្ថុតាងមួយចំនួន។

ក្នុងប្រតិបត្តិការនេះ បានធ្វើឡើងកាលពីវេលាម៉ោង០៩និង៣០យប់ ថ្ងៃទី០៩ ខែតុលា ឆ្នាំ២០២២ ស្ថិតនៅផ្ទះលេខ៥៩ ផ្លូវលេខ៤៣២ ភូមិ៤ សង្កាត់ទួលទំពូងទី២ ខណ្ឌចំការមន រាជធានីភ្នំពេញ។

ក្នុងវង្វង់ប្រតិបត្តិការនេះមានការដឹកនាំដោយលោក កៀង ល័ក្ស អភិបាលនៃគណៈអភិបាលខណ្ឌចំការមន មានការសម្របសម្រួលពីលោក ទុង រតនា ព្រះរាជអាជ្ញារងអយ្យការអមសាលាដំបូងរាជធានីភ្នំពេញ ។

យោងតាមប្រភពព័ត៌មានពីមន្រ្តីអាជ្ញាធរមូលដ្ឋានបានឲ្យដឹងថា មុនឈានដល់ការចុះបង្ក្រាបទីតាំងខាងលើ គឺមានការផ្ដល់ព័ត៌មានច្បាស់ការថា ទីតាំងនេះនៅបន្តលួចលាក់បម្រើសេវា អនឡាញ បង្កប់ល្បែងស៊ីសង ដោយផ្គើននឹងប្រសាសន៍របស់ថ្នាក់ដឹកនាំ។ ដូច្នេះកម្លាំងអាជ្ញាធរខណ្ឌចំការមន បានឆ្មក់ចុះដល់ទីតាំងនេះពិនិត្យឃើញថា ទីតាំងនេះមានទទួលភ្នាល់លេងល្បែងស៊ីសង (បាក្រាត,ភ្នាល់ចាក់បាល់…) គ្រប់ប្រភេទ  ដែលមានសម្ភារៈបម្រើសេវាអនឡាញខុសច្បាប់។

ក្រោយប្រតិបត្តិការកម្លាំងអាជ្ញាធរបានធ្វើការដកហូតសម្ភារៈរួមមាន កុំព្យូទ័រ០១ឈុត លុយខ្មែរជិត៣លានរៀល លុយដុល្លារជាង១០០០ដុល្លារ និងឃាត់មនុស្សជាបុគ្គលិកចំនួន០២នាក់​ប្រគល់ឲ្យប៉ុស្ដិ៍នគរបាលរដ្ឋបាលទួលទំពូងទី២​ ដើម្បីអនុវត្តនីតិវិធីបន្តតាមច្បាប់។ ចំណែកទីតាំងខាងលើអាជ្ញាធរសម្រេចផ្អាកអាជីវកម្ម និងបិទទ្វារឃ្លុំបេជាបណ្ដោះអាសន្ន៕

អត្ថបទ៖ សុខា