ច្រកអន្តរជាតិដូង ផ្អាកការធ្វើចរាចរណ៍ ដោយសារទឹកជន់ខ្លាំង

ខេត្តបាត់ដំបង ÷ ច្រកអន្តរជាតិដូង ដែលផ្សាភ្ជាប់ពីស្រុកកំរៀង ខេត្តបាត់ដំបង ទៅកាន់ស្រុកពោងណាំរ៉ន ខេត្តច័ន្ទបុរី ប្រទេសថៃ ត្រូវបានបិទចរាចរណ៍ជាបណ្តោះអាសន្ន សម្រាប់រថយន្តគ្រប់ប្រភេទ ដោយសារទឹកឡើងខ្លាំង។

យោងតាមប្រភពពីព្រំដែនបានបញ្ជាក់ថា ចាប់តាំងពីព្រលប់ថ្ងៃទី១០ រហូតមកទល់ព្រឹកថ្ងៃទី១១ ខែតុលា ឆ្នាំ២០២២នេះ ទឹកអូរតាមខ្សែបន្ទាត់ព្រំដែនកម្ពុជា ថៃ បានចាប់ផ្តើមហក់ឡើងយ៉ាងលឿនបំផុត ដែលបណ្តាលឱ្យលិចច្រកអន្តរជាតិដូង ដែលស្ថិតក្នុងភូមិអូរដារលើ ឃុំបឹងរាំង ស្រុកកំរៀង ខេត្តបាត់ដំបង។

នៅព្រឹកនេះដែរ សមត្ថកិច្ចជួរមុខ បានបិទបារ៉ាស់ជាបណ្តោះអាសន្ន ដោយមិនអនុញ្ញាតឱ្យមធ្យោបាយគ្រប់ប្រភេទ ធ្វើចរាចរណ៍ឆ្លងកាត់ឡើយ ព្រោះខ្លាចជួបនឹងបញ្ហាណាមួយជាយថាហេតុ ដោយរង់ចាំដល់ទឹកស្រកសិន។

ដោយឡែកនៅតាមតំបន់មួយចំនួនក្បែអូរព្រំដែនក៏កំពុងទទួលរងនូវទឹកជំនន់នេះដែរ ដោយសារតែតំបន់ខ្លះជាតំបន់​ទំនាប គឺធ្វើឱ្យទឹកអូរព្រំដែនបែកធ្លាយហូរកាត់តែម្តង។ កម្ពុជាថ្មី នឹងបន្តតាមដាន ជុំវិញទឹកជំនន់នេះ ប្រសិនបើមាន​អ្វីប្រែប្រួល៕ អត្ថបទ : សោ និយមរ័ត្ន