ព័ត៌មានអន្ដរជាតិ

កូរ៉េខាងត្បូង និងអាមេរិក ធ្វើសមយុទ្ធទប់អាវុធនុយក្លេអ៊ែរ និងមីស៊ីលរបស់ កូរ៉េខាងជើង

បានផុស

៤ years មុន

នៅ

ថ្ងៃចន្ទ ១៧ តុលា ២០២២

ដោយ

អគ្គសេនាធិការចម្រុះរបស់កូរ៉េខាងត្បូងបាននិយាយថា សមយុទ្ធយោធារវាងកូរ៉េខាងត្បូង និងអាមេរិកត្រូវបានរៀបចំឡើងដើម្បីឆ្លើយតបទៅនឹងការគំរាមកំហែងដ៏មានសក្តានុពលជាច្រើន រួមទាំងការបង្កឡើងដោយអាវុធនុយក្លេអ៊ែរ និងមីស៊ីលរបស់កូរ៉េខាងជើង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាកូរ៉េខាងត្បូង និងសហរដ្ឋអាមេរិកក៏កំពុងប្រុងជើងការចំពោះប្រតិកម្មណាមួយដែលអាចកើតមានពីកូរ៉េខាងជើង លើសមយុទ្ធយោធារវាងទីក្រុងសេអ៊ូល និងទីក្រុងវ៉ាស៊ីនតោនដែលចាប់ផ្ដើមនៅថ្ងៃចន្ទនេះ ហើយគ្រោងនឹងបញ្ចប់នៅថ្ងៃទី ២៨ ខែតុលា ។

នាយសេនាធិការចម្រុះក៏និយាយផងដែរថា ទាហានអាមេរិកដែលឈរជើងនៅក្នុងប្រទេសកូរ៉េខាងត្បូងនឹងចូលរួមក្នុងសមយុទ្ធមួយចំនួនដើម្បីបង្កើនសមត្ថភាពប្រតិបត្តិការទៅវិញទៅមក ។

កាលពីថ្ងៃសុក្រ ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីពីជាយក្រុងព្យុងយ៉ាង និងកាំភ្លើងធំប្រហែល ៩០ គ្រាប់ពីខេត្ត Kangwon ភាគអាគ្នេយ៍ឆ្ពោះទៅសមុទ្រជប៉ុន ហើយក៏បានបាញ់កាំភ្លើងធំប្រហែល ៣០០ គ្រាប់ចេញពីខេត្ត South Hwanghae ភាគនិរតីឆ្ពោះទៅសមុទ្រលឿង ខណៈកូរ៉េខាងជើងបានហៅវិធានការនេះថាជាការព្រមាន ដល់កូរ៉េខាងត្បូងក្នុងការឆ្លើយតបនឹងការបាញ់កាំភ្លើងធំរបស់កូរ៉េខាងត្បូង ។

ប្រទេសទាំងពីរបានព្រមព្រៀងគ្នាក្នុងឆ្នាំ ២០១៨ ស្ដីពីការមិនបាញ់គ្រាប់កាំភ្លើងធំចូលទៅក្នុងតំបន់ការពារដែនសមុទ្រ ដែលបម្រើជាព្រំដែនសមុទ្រអន្តរកូរ៉េ ខណៈកូរ៉េខាងត្បូងបាននិយាយថា គ្រាប់កាំភ្លើងធំដែលបានបាញ់ដោយកូរ៉េខាងជើងកាលពីថ្ងៃសុក្របានធ្លាក់ចូលទៅក្នុងដែនទឹករបស់ភាគីកូរ៉េខាងជើង ។

ទន្ទឹមនោះ រដ្ឋមន្ត្រីការពារជាតិកូរ៉េខាងត្បូង លោក Lee Jong-sup បានព្រមានកាលពីថ្ងៃអាទិត្យថា ការបាញ់ផ្លោងរបស់កូរ៉េខាងជើងអាចជាការចាប់ផ្តើមនៃការបង្កហេតុ ផ្អែកលើសេណារីយ៉ូដែលបានរៀបចំទុកជាស្រេច ហើយកូរ៉េខាងត្បូងក៏នឹងឈរយ៉ាងម៉ឺងម៉ាត់ប្រឆាំងនឹងការបង្កហេតុណាមួយរបស់កូរ៉េខាងជើងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មិនខ្វល់រឿងដាក់ទណ្ឌកម្ម, កូរ៉េខាងជើង បន្តបាញ់កាំភ្លើងធំ និងយន្តហោះចម្បាំង ក្បែរព្រំដែន