ពលរដ្ឋ​ស្នើឲ្យអាជ្ញាធរ​សម្រួលនីតិវិធី​ធ្វើប្លង់កម្មសិទ្ធិដី​ធ្លី និងដោះស្រាយបញ្ហាមួយចំនួន

នៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនៅបរិវេណ​វត្តវាលស្បូវ សង្កាត់វាលស្បូវ ខណ្ឌច្បារអំពៅនៅព្រឹកថ្ងៃទី ២៧ ខែតុលានេះ ប្រជាពលរដ្ឋ​បានស្នើឲ្យអាជ្ញាធរជួយដោះស្រាយជាសំណើរ សំណូមពរមួយចំនួន មានទាំងការស្នើសុំឲ្យអន្តរាគមន៍សម្រួលលើនីតិវិធីនៃការធ្វើប្លង់កម្មសិទ្ធិដីធ្លីឲ្យនៅចំនួនតិច ការសុំធ្វើផ្លូវ លូ ដោះស្រាយបញ្ហាលិចលង់ បញ្ហាចោរលួច ចោរប្លន់និងបញ្ហាគ្រឿងញៀនជាដើម។

វេទិកានេះធ្វើឡើងក្រោមវត្តមានលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ស៊ុយ សេរិទ្ធ អភិបាលរងរាជធានីតំណាងឲ្យលោក ឃួង ស្រេង អភិបាលរាជធានីភ្នំពេញ។

មន្ត្រីនៃមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញបានបញ្ជាក់ប្រាប់ប្រជាពលរដ្ឋថា៖ នៅរាជធានីភ្នំពេញ ក្រុមការងារនៃមន្ទីរបានចែកជា៨ក្រុមដើម្បីបំពេញការងារលើការផ្តល់ប្លង់កម្មសិទ្ធិជូនប្រជាពលរដ្ឋនេះ ហើយនីតិវិធីទាំងអស់គឺធ្វើដូចគ្នា មិននៅក្រៅច្បាប់នោះទេ ចំពោះប្រជាពលរដ្ឋដែលបានលើកឡើងថា ការបំពេញឯកសារ មានភាពស្មុគស្មាញនោះ គឺដោយសារប្រជាពលរដ្ឋមិនមានឯកសារគ្រប់គ្រាន់ដូចជា អ្នកខ្លះឈ្មោះក្នុងសៀវភៅស្នាក់នៅ អត្តសញ្ញាណប័ណ្ណ និងសំបុត្រកំណើតខុសគ្នា ដែលតម្រូវឲ្យពួកគាត់កែតម្រូវជាដើម។

ចំពោះការសុំធ្វើផ្លូវ ប្រព័ន្ធលូ ការស្នើសុំដោះស្រាយបញ្ហាលិចលង់លោក ចេង មុនីរ៉ា អភិបាលខណ្ឌច្បារអំពៅ បានមានប្រសាសន៍លើកឡើងថា៖ បញ្ហានេះអាជ្ញាធរខណ្ឌ និងអាជ្ញាធររាជធានីភ្នំពេញបានយកចិត្តទុកដាក់ណាស់ ដើម្បីដោះស្រាយជូនប្រជាណលរដ្ឋ តែយើងមិនអាចដោះស្រាយបានភ្លាមៗនិងបាន១០០%នោះទេ។

ចំពោះការដោះស្រាយបញ្ហាលិចលង់ដោយជំនន់ទឹកភ្លៀងគឺវាតែងតែកើតឡើងដោយសារថា តំបន់មួយចំនួននៅក្នុងខណ្ឌច្បារអំពៅនេះ ត្រូវបានអភិវឌ្ឍដោយការចាក់ដីបំពេញ និងបានយកនីវូផ្លូវជាតិលេខ១ និងផ្លូវថៃហ្គើ ​(ផ្លូវលេខ១១៤)​ជាគោល ដែលមានកំពស់ខ្ពស់ជាងភូមិដ្ឋានរបស់ពួកគាត់ប្រមាណ២ម៉ែត្រ ទើបធ្វើឲ្យលំនៅដ្ឋានរបស់ពួកគាត់លិចលង់។ ប៉ុន្តែករណីនេះ អាជ្ញាធរខណ្ឌរាជធានីភ្នំពេញ ក្រោយការណែនាំផ្ទាល់ពីលោក ឃួង ស្រេង អភិបាលរាជធានីភ្នំពេញមិនបានព្រងើយកន្តើយឡើយ ពោលគឺបានដោះស្រាយភ្លាមៗជូនប្រជាពលរដ្ឋ ដោយពេលនេះគ្រឿងចក្របាននិងកំពុងធ្វើសកម្មភាពកាយនៅឡើយ ហើយរថយន្តបូមទឹកក៏បានធ្វើសកម្មភាពបូមផងដែរ។

ពាក់ព័ន្ធបញ្ហាចោរលួច ចោរប្លន់ និងបញ្ហាគ្រឿងញៀនវិញលោកអធិការខណ្ឌច្បារអំពៅក៏បានធ្វើការបកស្រាយផងដែរ ដោយករណីបែបនេះ កងកម្លាំងនិងពង្រឹកកិច្ចការពារសន្តិសុខ សុវត្ថិភាពជូនប្រជាពលរដ្ឋឲ្យកាន់តែល្អថែមទៀត ជាមួយនឹងការសន្យាលុបបំបាត់គ្រឿងញៀនអោយអស់ពីមូលដ្ឋាន។

ប្រធានក្រុមប្រឹក្សារាជធានីភ្នំពេញ លោក ម៉ប់ សារិន បានមានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនេះ គឺផ្តោតសំខាន់ពាក់ព័ន្ធនិងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍នៅមូលដ្ឋាន ដើម្បីឱ្យអាជ្ញាធរបានដឹងឭ និងរកយន្តការដោះស្រាយជូន។

វេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំបេញ ត្រូវបានធ្វើឡើងក្នុង១ឆ្នាំម្តង ដើម្បីដោះស្រាយរាល់កង្វល់ សំណូមពរនិងសំណើររបស់ប្រជាពលរដ្ឋ។ ប៉ុន្តែក្នុងរយៈពេល២ឆ្នាំជាប់គ្នានេះត្រូវបានខកខានដោយការរាតត្បាតជំងឺកូវីដ-១៩ យើងមិនបានជួបជុំគ្នាបែបនេះទេ៕

អត្ថបទ៖ ស្រីរ័ត្ន