ស្លាប់កម្មករ៥នាក់ និងកំពុងសង្គ្រោះបន្ទាន់ជាច្រើននាក់ សង្ស័យពុលថ្នាំក្នុងចម្ការចេក ឡុង ស្រេង បឹងកេត

មកដល់ថ្ងៃនេះមានកម្មករចំនួន៥នាក់បានស្លាប់ក្នុងចម្ការចេក ឡុង ស្រេង បឹងកេត ស្រុកស្ទឹងត្រង់ និងមនុស្សជាច្រេីននាក់ មានអាការៈថប់ដង្ហើម (ពុលថ្នាំ) ខណៈកំពុងថ្នាំស្មៅនៅក្នុងចម្ការចេក។

ហេតុការណ៍នេះបានកេីតឡេីងកាលពីថ្ងៃទី២៨ ខែតុលា ឆ្នាំ២០២២ នៅវេលាម៉ោង២និង៤៥នាទី នៅក្នុងចម្ការចេក ឡុង ស្រេង ស្ថិតក្នុងភូមិ៣៥ ឃុំព្រែកកក់ ស្រុកស្ទឹងត្រង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេីការបញ្ជាក់ពីលោក ឯម វឌ្ឍនា អធិការស្រុកស្ទឹងត្រង់ បានឲ្យដឹងថា មានកម្មករប្រុសចំនួនបីនាក់បានស្លាប់ពេលបញ្ជូនទៅកាន់មន្ទីរពេទ្យខេត្តកំពង់ចាម ខណៈបាញ់ថ្នាំពុល និងបោចស្មៅក្នុងចម្ការចេក បន្ទាប់មកមានអាការៈ ថប់ៗ ពិបាកដកដង្ហើម និងចុកទ្រូង។

លោកអធិការបញ្ជាក់ទៀតថា គឺរង់ចាំខាងក្រុមគ្រូពេទ្យពិនិត្យព្យាបាលតាមសិនថាតេីបង្កមកពីមូលហេតុអ្វី? ព្រោះបច្ចុប្បន្ន កម្មករជាច្រេីនដែលមកពិនិត្យព្យាបាលនៅមន្ទីរពេទ្យខេត្តកំពង់ចាម ហេីយបានធូរស្រាលត្រឡប់ទៅផ្ទះវិញ។

បេីតាមសម្តីជនរងគ្រោះដែលធ្វេីការនៅចម្ការចេក ឡុង ស្រេង បឹងកេត នោះ បានបញ្ជាក់ប្រាប់ថា ក្រោយពីពួកគេយកថ្នាំបាញ់ស្មៅ ក្នុងចម្ការដូចសព្វដង រួចស្រាប់តែកម្មករជាច្រេីននាក់ ចាប់ផ្តេីមមានអាការៈ ថប់ៗ ពិបាកដកដង្ហើម និងចុកទ្រូង ហេីយប្រសិនបេីមិនបានបញ្ជូលមកកាន់មន្ទីរពេទ្យទាន់ពេលទេនោះអាចបង្កឲ្យស្លាប់ភ្លាមៗ។

បច្ចុប្បន្នជនរងគ្រោះជាច្រេីននាក់ មានសភាពធូរស្រាល និងកំពុងបន្តព្យាបាលនៅមន្ទីរពេទ្យបង្អែកស្រុកស្ទឹងត្រង់ និងមន្ទីរពេទ្យខេត្តកំពង់ចាម ចំណែកសាកសពជនរងគ្រោះត្រូវសមត្ថកិច្ចប្រគល់ជូនក្រុមគ្រួសារយកធ្វើបុណ្យតាមប្រពៃណី៕

អត្ថបទ៖ ឡេក ចាន់ពេជ្រ