សម្តេចតេជោ៖ លុយយើងអាចចាយអស់ក្នុង១ថ្ងៃ​ឬ១ឆ្នាំ តែកេរដំណែល​យើងរកបានប៉ុន្មានថ្ងៃនេះ​ចាយមិនអស់ទេ

​​សម្តេចតេជោ ហ៊ុន សែន ប្រធានអាស៊ានប្តូរវេន បានមានប្រសាសន៍ថា មានសមិទ្ធផលជាច្រើន ដែលកម្ពុជា ទទួលបានពីកិច្ចប្រជុំកំពូលអាស៊ានលើកទី៤០ ទី៤១ និងកិច្ចប្រជុំកំពូលពាក់ព័ន្ធ រយៈពេលប៉ុន្មានថ្ងៃមកនេះ។

សម្តេចតេជោ បានគូសបញ្ជាក់ដូច្នេះថា« លុយយើងអាចចាយអស់មួយថ្ងៃ ឬមួយឆ្នាំ ក៏ប៉ុន្តែកេរដំណែល​ដែលយើងរកបានក្នុងប៉ុន្មានថ្ងៃនេះ ចាយវាមិនអស់ទេ ១០០ឯកសារ ដែលបានសម្រេចនៅទីក្រុងភ្នំពេញ ១០០ឯកសារទុកនៅតាមបណ្ណាល័យនានា សម្រាប់កូនចៅយើងរៀនសូត្រនៅពេលក្រោយ» ដែលនេះ គឺជាផលប្រយោជន៍សម្រាប់កម្ពុជា។

ក្រៅពីនេះកម្ពុជា បានពង្រឹងកិច្ចសហប្រតិបត្តិការជាមួយដៃគូអាស៊ានកាន់តែរឹងមាំថែមទៀត។ សម្តេច បានបន្តថា ប្រទេសនានា បានគាំទ្រកម្ពុជា ធ្វើជាប្រធានអាស៊ាន ដោយប្រទេសខ្លះ ​បានផ្តល់ជំនួយជាសម្ភារៈ ប្រទេសខ្លះទៀត ផ្តល់ជាថវិកា។ ជាក់ស្តែង ជប៉ុន បានជួយជាថវិកាសម្រាប់ការប្រជុំស្តីពីសង្គម និងវប្បធម៌។ លើសពីនេះទៀត កម្ពុជា ជប៉ុនបានព្រមព្រៀងគ្នាបង្កើត លើកកម្រិតពីដៃគូយុទ្ធសាស្រ្តទៅជាដៃគូយុទ្ធសាស្រ្តគ្រប់ជ្រុងជ្រោយនៅឆ្នាំ ២០២៣។​

រីឯចិន បានផ្តល់ថវិកា សម្ភារៈ និងបានចុះហត្ថលេខាផ្តល់សម្បទានឥណទានសម្រាប់សាងសង់ស្ពាននៅខេត្តក្រចេះ និងផ្លូវពីខេត្តក្រចេះ ទៅខេត្តកំពង់ធំ។

សម្តេចសង្កត់ធ្ងន់ថា« សមិទ្ធផលទាំងនេះ វាមិនមែនជាផលប្រយោជន៍សម្រាប់ ហ៊ុន សែន តែម្នាក់ទេ ត្រូវដឹងថា ហ៊ុន សែន តំណាងឱ្យជាតិខ្មែរ នាពេលនេះ ហើយខ្ញុំបានចែករំលែកថ្វាយព្រះមហាក្សត្រ និងប្រគេនចំពោះហ្លូងម៉ែ ប្រគេនចំពោះព្រះសង្ឃ ជូនចំពោះជនរួមជាតិ ក៏ដូចជារដ្ឋបាលគ្រប់ជាន់ថ្នាក់»។ លើសពីនេះទៀត នៅមាន​សមិទ្ធផលជាច្រើនដែលកម្ពុជា ទទួលបាន។

ផ្ទុយទៅវិញ សម្តេច បានលើកឡើងថា ប្រសិនបើជនណាមើលមិនឃើញថានេះជាផលប្រយោជន៍ជាតិ ខ្ញុំមិនដឹងថា តើគេជាជាតិសាសន៍អ្វីទេ?

សូមបញ្ជាក់ថា ក្រោយបញ្ចប់កិច្ចប្រជុំកំពូលអាស៊ាន សម្តេចតេជោ ហ៊ុន សែន នាយករដ្ឋមន្រ្តី បានគូសបញ្ជាក់នៅក្នុង​សន្និសីទសារព័ត៌មាននារសៀលថ្ងៃទី ១៣ វិច្ឆិកា ថា កិច្ចប្រជុំនេះ ដំណើរការទៅដោយរលូន ទទួលបានជោគជ័យ​យ៉ាងត្រចះត្រចង់ និងជាប្រវត្តិសាស្រ្តរបស់កម្ពុជាផងដែរ។ សម្ដេចតេជោបានមានប្រសាសន៍ថា នេះជាភាពជោគជ័យ​លើកទី៣ ព្រោះកម្ពុជា បានទទួលរៀបចំកិច្ចប្រជុំអាស៊ានចំនួន៣លើករួចមកហើយ គឺកាលពីឆ្នាំ២០០២ ឆ្នាំ២០១២ និងឆ្នាំ២០២២នេះ។

កិច្ចប្រជុំកំពូលអាស៊ាន ដែលកម្ពុជាធ្វើជាប្រធាន និងជាម្ចាស់ផ្ទះ បានប្រព្រឹត្តិទៅអស់រយៈពេល ៤ថ្ងៃ គឺចាប់ពីថ្ងៃទី ១០-១៤ ឆ្នាំ ២០២២៕

​​