ក្រសួងកសិកម្មអបអរ កូនផ្សោតកម្រថ្មី កើតឆ្នាំថោះ

ក្រសួងកសិកម្ម រុក្ខាប្រមាញ់ និងនេសាទ បានសម្ដែងសេចក្ដីអបអរ ខណៈឆ្នាំថ្មី កម្ពុជាទទួលចំណងដៃធម្មជាតិដ៏កម្រថ្មី គឺកូនផ្សោត ដែលតាមការពិនិត្យកូនផ្សោតទី២ ក្នុងឆ្នាំ២០២៣នេះ កើតក្នុងកំឡុងថ្ងៃចូលឆ្នាំថ្មី ឆ្នាំថោះ។

ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងរសៀលថ្ងៃទី១៨ ខែមេសា ឆ្នាំ២០២៣នេះថា កាលថ្ងៃទី២ នៃពិធីបុណ្យចូលឆ្នាំថ្មី ឆ្នាំថោះ ត្រូវនឹងថ្ងៃទី១៥ ខែមេសា ឆ្នាំ២០២៣ អ្នកបើកទូកទេសចរប្រចាំអន្លង់កាំពី បានប្រទះឃើញកូនផ្សោតកើតថ្មីចំនួន ១ក្បាល កំពុងហែលលេងជាមួយហ្វូងផ្សោតពេញវ័យជាច្រើនទៀតនៅអន្លង់កាំពី ភូមិកាំពី ឃុំ ស្រុកចិត្របុរី ខេត្តក្រចេះ។ អ្នកបើកទូកទេសចរបានរាយការជូនប្រធានឆ្នាំទន្លេ និងមន្ត្រីជលផលខេ្តតក្រចេះ និងបុគ្គលិកអង្គការ WWF ដើម្បីជាព័ត៌មាន កត់ត្រា និងតាមដានបន្តទៀត។

ថ្ងៃទី១៨ ខែមេសា ឆ្នាំ២០២៣នេះ ក្រុមស្រាវជ្រាវនៃខណ្ឌជលផលខេត្តក្រចេះ និងអង្គការ WWF បានចុះតាមដានកូនផ្សោតទើបកើតថ្មី ដោយតាមការប៉ាន់ប្រមាណកូនផ្សោតនេះទើបតែមានអាយុប្រមាណ ៣ថ្ងៃ ក្នុងកំឡុងពិធីបុណ្យចូលឆ្នាំថ្មីតែម្ដង។ នេះជាកូនផ្សោតទី២ ដែលបានកត់ត្រានៅ ឆ្នាំ២០២៣នេះ។

គួរបញ្ជាក់ថា នៅឆ្នាំ២០២១ ក្រុមការងារបានកត់ត្រាកូនផ្សោតបានចំនួន ៦ក្បាល និងនៅឆ្នាំ២០២២ ក្រុមការងារបានកត់ត្រាកូនផ្សោតបានចំនួន ៦ក្បាល៕

អត្ថបទ៖ ច័ន្ទ វីរៈ