ព័ត៌មានអន្ដរជាតិ

លោក Kishida ធ្វើទស្សនកិច្ចកូរ៉េខាងត្បូង ខណៈមានភាពតានតឹងជាមួយ កូរ៉េខាងជើង

បានផុស

៣ years មុន

នៅ

ថ្ងៃអាទិត្យ ៧ ឧសភា ២០២៣

ដោយ

នៅថ្ងៃអាទិត្យទី៧ខែឧសភា នាយករដ្ឋមន្ត្រីជប៉ុនលោក Fumio Kishida បានចាកចេញពីទីក្រុងតូក្យូ ដើម្បីបំពេញទស្សនកិច្ចរយៈពេល២ថ្ងៃនៅប្រទេសកូរ៉េខាងត្បូង សម្រាប់កិច្ចពិភាក្សាកំពូលទ្វេភាគី។

មុនពេលធ្វើដំណើរទៅកាន់ទីក្រុងសេអ៊ូល លោក Kishida បានប្រាប់អ្នកយកព័ត៌មានថា លោកចង់ដោះដូរយោបល់ដោយស្មោះត្រង់ជាមួយប្រធានាធិបតីកូរ៉េខាងត្បូងលោក Yoon Suk-yeol ដោយផ្អែកលើការជឿទុកចិត្តគ្នាទៅវិញទៅមក។

មេដឹកនាំទាំងពីរត្រូវបានគេរំពឹងថា នឹងយល់ព្រមបង្កើនកិច្ចសហប្រតិបត្តិការផ្នែកសន្តិសុខ។ សកម្មភាពនេះគឺសំដៅដោះស្រាយបញ្ហានានា ដូចជាកម្មវិធីអភិវឌ្ឍន៍នុយក្លេអ៊ែរ និងមីស៊ីលរបស់កូរ៉េខាងជើងជាដើម។

របៀបវារៈនៃកិច្ចប្រជុំកំពូល ក៏ទំនងជារួមបញ្ចូលទាំងកិច្ចសហប្រតិបត្តិការសន្តិសុខសេដ្ឋកិច្ចនៅក្នុងការផលិតឧបករណ៍អេឡិចត្រូនិក ក៏ដូចជាការត្រួតពិនិត្យការនាំចេញផងដែរ។

លើសពីនេះ មេដឹកនាំទាំងពីរ ត្រូវបានគេរំពឹងថានឹងចែករំលែកព័ត៌មាន ស្តីពីការអនុវត្តផែនការជាមួយគោលបំណងដោះស្រាយបញ្ហាពលកម្មក្នុងសម័យសង្គ្រាម។

គួរបញ្ជាក់ថា ដំណើរទស្សនកិច្ចរបស់លោក Kisihda កើតឡើងបន្ទាប់ពីនាយករដ្ឋមន្ត្រីរូបនេះ ឈានដល់កិច្ចព្រមព្រៀងមួយជាមួយលោក Yoon ក្នុងអំឡុងពេលកិច្ចប្រជុំនៅទីក្រុងតូក្យូកាលពីខែមីនា៕

ប្រែសម្រួល៖ Vann Vann

ប្រភព៖ NHK

ចុចអាន៖ ប៉ូលិសរកឃើញតម្រុយថ្មីបន្ថែមទៀតរបស់ជនសង្ស័យប៉ុនប៉ងធ្វើឃាតនាយករដ្ឋមន្ត្រី ជប៉ុន