ព័ត៌មានជាតិ

រាជរដ្ឋាភិបាលត្រៀមបណ្ដុះបណ្ដាលជំនាញវិជ្ជាជីវៈដល់យុវជនទូទាំងប្រទេស ១លាន ៥សែននាក់

បានផុស

៣ years មុន

នៅ

ថ្ងៃចន្ទ ១៥ ឧសភា ២០២៣

ដោយ

រដ្ឋាភិបាលកម្ពុជាត្រៀមរៀបចំផែនការបណ្ដុះបណ្ដាលជំនាញវិជ្ជាជីវៈដល់យុវជននៃគ្រួសារក្រីក្រ និងងាយរងគ្រោះទូទាំងប្រទេសកម្ពុជាប្រមាណជា ១លាន ៥សែននាក់ និងការធានាដោយរដ្ឋ ក្នុងការផ្ដល់ប្រាក់ឧបត្ថម្ភចាប់ពីឆ្នាំ ២០២៣នេះតទៅ។

លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ក្នុងឱកាសជួបសំណេះសំណាលជាមួយប្រធានរដ្ឋបាល ប្រធានផ្នែកនៅតាមរោងចក្រសហគ្រាសកាលពីថ្ងៃទី១៤ ខែឧសភា ម្សិលមិញនេះលើកឡើងថា ពាក់ព័ន្ធទៅការត្រៀមរៀបចំផែនការបណ្ដុះបណ្ដាលនូវជំនាញវិជ្ជាជីវៈ របស់រាជរដ្ឋាភិបាលដល់យុវជននៃគ្រួសារក្រីក្រ និងងាយរងគ្រោះ គឺដើម្បីអាចផ្ដល់ឱកាសឱ្យពួកគេ អាចទទួលបានជំនាញសម្រាប់យកទៅធ្វើការងារ ឬបង្កើតមុខរបរដោយខ្លួន និងបំពេញតម្រូវការនៃកម្លាំងពលរដ្ឋកម្មជំនាញសម្រាប់ការវិនិយោគថ្មីៗនៅក្នុងប្រទេស។

ទន្ទឹមនឹងឱកាសការងារនៅក្នុងស្រុក រាជរដ្ឋាភិបាលបានផ្ដល់ជម្រើសដល់ពលរដ្ឋ ដែលមានបំណងចង់ធ្វើការងារនៅក្រៅប្រទេស ដោយបានខិតខំពង្រឹងកិច្ចសហការជាមួយបណ្ដាប្រទេសដៃគូ ដើម្បីទទួលបានឱកាសការងារនៅក្រៅប្រទេសដល់ពលករសរុបប្រមាណ ១.៣លាននាក់ អាចទទួលបានប្រាក់ចំណូល បានចំណេះជំនាញ ថែមទាំងអាចផ្ញើប្រាក់បញ្ញើមកក្នុងប្រទេសដល់គ្រួសារប្រមាណ ២.៧ពាន់លានដុល្លារអាមេរិកក្នុងមួយឆ្នាំៗ និងចូលរួមការអភិវឌ្ឍប្រទេសជាតិ។

បន្ថែមពីនេះ លោក អ៊ិន សំហេង ក៏បានឱ្យដឹងទៀតថា បច្ចុប្បន្នសហគ្រាស-គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្ដុះបណ្ដាលវិជ្ជាជីវៈចំនួន ១៧,១០២ សហគ្រាស មានកម្មករនិយោជិកចំនួន ១.៥លាននាក់ ដោយបានទទួលប្រាក់ឈ្នួលជាមធ្យមសរុបជាង ៤.៥៥ពាន់លានដុល្លារអាម៉េរិកក្នុងមួយឆ្នាំៗ មានប្រជាពលរដ្ឋប្រមាណជាង២លាននាក់ ដែលទទួលផលដោយប្រយោលពីវិស័យនេះ។

ដោយឡែក វិស័យវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបមានរោងចក្រចំនួន ១,៣២៥ តម្លៃសរុបនៃការនាំចេញមានចំនួនប្រមាណជាង ១២,៨ពាន់លានដុល្លារអាម៉េរិក (ឆ្នាំ២០២២) មានកម្មករនិយោជិកចំនួនជាង ៨៥ម៉ឺននាក់ ហើយកម្ពុជាបានក្លាយជាប្រទេសនាំមុខមួយក្នុងការនាំចេញផលិតផលកាត់ដេរនៅលើទីផ្សារអន្តរជាតិផងដែរ។

គួរបញ្ជាក់ថា បច្ចុប្បន្នសហគ្រាស-គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្ដុះបណ្ដាលវិជ្ជាជីវៈ មានចំនួន ១៧,១០២សហគ្រាស ដែលមានកម្មករនិយោជិកចំនួន ១.៥លាននាក់ ដោយបានទទួលប្រាក់ឈ្នួលជាមធ្យមសរុបជាង ៤.៥៥ពាន់លានដុល្លារអាម៉េរិក ក្នុងមួយឆ្នាំៗ និងមានប្រជាពលរដ្ឋប្រមាណជាង ២លាននាក់ ដែលទទួលផលដោយប្រយោលពីវិស័យការងារ វាយនភណ្ឌ នេះ៕