សម្ដេចតេជោ ហ៊ុន សែន ៖ ថ្ងៃទី ២៨ មិថុនា ២០២៣នេះ គឺជាខួប ៧២ឆ្នាំថ្ងៃកំណើតគណបក្សប្រជាជនកម្ពុជា

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានបញ្ជាក់ថា នៅថ្ងៃនេះ គឺជាខួប ៧២ឆ្នាំថ្ងៃកំណើតគណបក្សប្រជាជនកម្ពុជា។ ការបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីជួបសំណេះសំណាលជាមួយកម្មករ-និយោជិត នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ២៨​ ខែមិថុនានេះ។

សម្ដេចតេជោ ហ៊ុន សែន បានថ្លែងថា នៅថ្ងៃទី ២៨ ខែមិថុនា ឆ្នាំ ២០២៣នេះ គឺជាខួប ៧២ឆ្នាំថ្ងៃកំណើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៣)។ នៅឆ្នាំនេះ គណបក្សប្រជាជនកម្ពុជា មិនបានរៀបចំពិធីរំលឹកថ្ងៃបង្កើតគណបក្សខួបលើកទី ៧២ នៅចំថ្ងៃទី ២៨ មិថុនានោះទេ ដោយនឹងត្រូវរៀបចំនៅថ្ងៃទី ១ ខែកក្កដា ដែលចំថ្ងៃទីមួយ នៃយុទ្ធនាការឃោសនាបោះឆ្នោតវិញ។

សម្ដេចតេជោ ហ៊ុន សែន ថ្លែងបន្តថា «តែយ៉ាងណាក៏យើងមិនឲ្យចន្លោះប្រហោង នៅក្នុងថ្ងៃនេះឃើញមានសាររបស់សមាជិក-សមាជិកា គណបក្សប្រជាជនបានបង្ហោះព្រោងព្រាត ស្ដីអំពីខួបអនុស្សាវរីយ៍លើកទី ៧២ឆ្នាំ»៕