ព័ត៌មានជាតិ

រដ្ឋមន្ត្រីការងារ ៖ ខ្ញុំ និងតំណាងកម្មករនិយោជិត មានក្ដីស្រមៃ និងគោលបំណងរួមគ្នា

បានផុស

៣ years មុន

នៅ

ថ្ងៃសៅរ៍ ២៦ សីហា ២០២៣

ដោយ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញពីក្ដីស្រមៃ និងគោលបំណង ៣ ធំៗ ដូចទៅនឹងក្ដីស្រមៃ និងគោលបំណងតំណាងកម្មករនិយោជិតដែរ ដែលពាក់ព័ន្ធនឹងវិស័យការងារ របបសន្តិសុខសង្គម ការបណ្ដុះបណ្ដាលជំនាញវិជ្ជាជីវៈ និងការលើកកម្ពស់ផលិតភាពរបស់កម្លាំងពលកម្មកម្ពុជា។ នេះបើយោងតាមហ្វេសប៊ុកផ្លូវការរបស់ លោក ហេង សួរ ដែលផ្សាយនៅព្រឹកថ្ងៃទី ២៦ ខែសីហានេះ ក្នុងពិធីជួបជុំជាមួយតំណាងកម្មករនិយោជិតក្រៅផ្លូវការ កាលពីយប់ថ្ងៃទី ២៥ ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពិធីជួបជុំជាមួយតំណាងកម្មករនិយោជិតក្រៅផ្លូវការនេះ មានការចូលរួមពីគ្រប់ប្រធានសហជីពដែលរួមមាន ៖ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា និង លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) ជាដើម។

តាមរយៈបណ្ដាញសង្គមហ្វេសប៊ុក លោករដ្ឋមន្ត្រីការងារ បានគូសបញ្ជាក់ថា ក្ដីស្រមៃ និងគោលបំណងធំៗ ទាំង ៣ នោះ រួមមាន ៖

១.ការពារកិត្តិយស សេចក្ដីថ្លៃថ្នូរ និងធ្វើឲ្យប្រសើរឡើង នៃជីវភាពរស់នៅរបស់កម្មករនិយោជិត ទាំងក្នុង និងក្រៅប្រព័ន្ធ ក៏ដូចជាពលករនៅក្រៅប្រទេស។

២.ខិតខំរក្សា និងទាក់ទាញអ្នកវិនិយោគបន្ថែម ដើម្បីរក្សាឆ្នាំងបាយចាស់ បង្កើតឆ្នាំងបាយថ្មី (ការងារថ្មីកាន់តែសមរម្យ) ដល់យុវជនដែលជាកូនចៅជំនាន់ក្រោយ និងធ្វើឲ្យសេដ្ឋកិច្ចកាន់តែរឹងមាំ។

ទី៣.រក្សាភាពសុខដុមរមនានៅកន្លែងធ្វើការ ដោយឈរលើមនសិការវិជ្ជាជីវៈ យកច្បាប់ជាគោល និងការសម្របសម្រួលគ្នាជាធំ ជៀសវាងការប្ដឹងផ្ដល់ញុះញង់អុចអាល ចង់ចាញ់ចង់ឈ្នះ ដោយមិនសមហេតុផល។

លោករដ្ឋមន្ត្រី ហេង សួរ គូសបញ្ជាក់បន្ថែមថា “ពិតជារីករាយនឹងការជួបជាមួយបងប្អូនតំណាងកម្មករនិយោជិតទាំងអស់ដោយមិនរើសមុខ ឲ្យតែការជួបនាំមកនូវហេតុផលនូវធាតុចូលល្អៗ ពាក់ព័ន្ធនឹងវិស័យការងារ របបសន្តិសុខសង្គម ការបណ្ដុះបណ្ដាលជំនាញវិជ្ជាជីវៈ និងការលើកកម្ពស់ផលិតភាពរបស់កម្លាំងពលកម្មរបស់កម្ពុជា ប្រសិនជាជួបគ្នាជាលក្ខណៈសាមញ្ញ និងមិនផ្លូវការបាននោះ កាន់តែប្រសើរ ពីព្រោះយើងអាចនិយាយអស់ពីចិត្តរៀងៗខ្លួន”។

សូមបញ្ជាក់ថា ក្រោយកាន់តំណែងជារដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈភ្លាម លោក ហេង សួរ បានឆ្លៀតពេលក្រៅម៉ោងរដ្ឋបាល ដើម្បីពិនិត្យមើលទិដ្ឋភាពពេលបម្រើការងារ ការទទួលទានអាហារពេលថ្ងៃត្រង់ និងចុះពិនិត្យស្វែងយល់ពីការរស់នៅរបស់កម្មករនិយោជិតពេលក្រោយម៉ោងធ្វើការជាដើម៕