យុទ្ធនាការកាត់បន្ថយការប្រើប្រាស់ប្លាស្ទិក «ថ្ងៃនេះ ខ្ញុំមិនប្រើថង់ប្លាស្ទិកទេ»​នៅតាមសាលារៀន

លោក ឡុង ឌីម៉ង់ អភិបាលរងខេត្តព្រះសីហនុ បានតំណាងរដ្ឋបាលខេត្តចូលរួម យុទ្ធនាការកាត់បន្ថយ​ការប្រើប្រាស់​ប្លាស្ទិក «ថ្ងៃនេះ ខ្ញុំមិនប្រើថង់ប្លាស្ទិកទេ»នៅតាមសាលារៀន និងពិធីចុះអនុស្សរណៈយោគយល់រវាងក្រសួង​បរិស្ថាននិងរដ្ឋបាលខេត្តព្រះសីហនុ ក្រោមអធិបតីភាព លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ថ្ងៃទី១៩ ខែវិច្ឆិកា ឆ្នាំ២០២៣។

បើតាមរដ្ឋបាលខេត្តព្រះសីហនុ យុទ្ធនាការនេះរៀបចំឡើងក្នុងគោលបំណង៖

១. ផ្សព្វផ្សាយជាផ្លូវការនូវចលនារួមគ្នាកាត់បន្ថយសំណល់ប្លាស្ទិកនៅកម្ពុជា តាមគោលការណ៍​ស្ម័គ្រចិត្តស្រប​តាមអនុក្រឹត្យរបស់រាជរដ្ឋាភិបាលស្ដីពីការគ្រប់គ្រងថង់ប្លាស្ទិក។

២. ជំរុញការចូលរួមរបស់សិស្សានុសិស្ស លោកគ្រូ អ្នកគ្រូ ស្ថាប័ន និងភាគីពាក់ព័ន្ធកាត់បន្ថយ និងឈប់ប្រើ​ប្រាស់ថង់ប្លាស្ទិក។

៣. ឆ្លុះបញ្ចាំងពីឆន្ទៈរួមគ្នារបស់ប្រជាពលរដ្ឋកម្ពុជាជាមួយប្រជាជាតិលើសកលលោក ក្នុងការកាត់បន្ថយការ​បំពុល​ដោយប្លាស្ទិកស្របទៅតាមគោលនយោបាយរបស់រាជរដ្ឋាភិបាល និងយុទ្ធសាស្ត្របញ្ចកោណ ដំណាក់កាលទី១។

សូមរម្លឹកថា កន្លងមករដ្ឋបាលខេត្តព្រះសីហនុ បានសាកល្បងអនុវត្ត គម្រោង តំបន់គ្មានថង់ប្លាស្ទិក បានយ៉ាង​ជោគជ័យនៅ វិទ្យាល័យហ៊ុនសែនមិត្តភាព (ក្រុងព្រះសីហនុ) និងរមណីយដ្ឋានកោះក្របីផងដែរ៕