អាជ្ញាធរខណ្ឌច្បារអំពៅ សំណូមពរម្ចាស់រថយន្តដឹកដី និងខ្សាច់ ចូលរួមថែរក្សាបរិស្ថានលើដងផ្លូវ

អាជ្ញាធរសាលាខណ្ឌច្បារអំពៅ សំណូមពរឱ្យម្ចាស់រថយន្តដឹកដី និងដឹកខ្សាច់ មេត្តាចូលរួមថែរក្សាបរិស្ថានលើដងផ្លូវឱ្យបានគ្រប់ៗគ្នា ដែលជារៀងរាល់ថ្ងៃប្រជាពលរដ្ឋ ក៏ដូចជាអ្នកធ្វើដំណើរ បាននាំគ្នាអាណិតអាសូរដល់កម្លាំងប្រជាការពារសាលាខណ្ឌច្បារអំពៅខិតខំបោសសំអាតដីខ្សាច់ជ្រុះលើកំណាត់ផ្លូវ។

យោងតាមប្រភពពីលោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅបានឱ្យដឹងថា រាល់ថ្ងៃនេះគឺកម្លាំងប្រជាការពារសាលាខណ្ឌច្បារអំពៅបានចុះទៅបោសសម្អាតដីខ្សាច់ដែលជ្រុះលើផ្លូវគ្មានលោះថ្ងៃឡើយ។

លោក គុយ គឹមហ៊ាង បានបន្តទៀតថា បើសិនជាផ្អាកបោសសំអាតផ្លូវតែមួយថ្ងៃគឺច្បាស់ជាកម្ទេចដីខ្សាច់ហុយពេញលើអ្នកដំណើរ ជាក់ជាពុំខាន។

នាយករងសាលាខណ្ឌ រូបនេះ​ បន្តថា ដីខ្សាច់ដែលជ្រុះលើផ្លូវក្នុងមូលដ្ឋានខណ្ឌច្បារអំពៅរាជធានីភ្នំពេញច្រើនតែនៅលើកំណាត់ផ្លូវជាតិលេខ១ និងផ្លូវថៃហ្គឺរ៍ ពិសេសក្បែរគល់ស្ពាន និងលើទ្រូងស្ពានព្រែកសំរោង បង្កឡើងដោយរថយន្តដឹកដីខ្សាច់ពេលកណ្តាលអធ្រាត្រតែម្តង។ ដូច្នេះសំណូមពររបស់អាជ្ញាធរគឺសុំឱ្យម្ចាស់រថយន្តដឹកខ្សាច់មេត្តាចូលរួមថែរក្សាបរិស្ថានលើដងផ្លូវផង។ ប្រសិនបើមិនដូចច្នេះទេនោះ អាជ្ញាធរនឹងប្រើវិធានការក្តៅ ដោយឃាត់រថយន្តទុកមិនយោគយល់ នោះឡើយ៕

អត្ថបទ ៖ នរា