អាជ្ញាធរសង្កាត់ចាប់រថយន្តដឹកដីដែលបំផ្លាញផ្លូវបេតុង និងគំរបលូ

រថយន្តដឹកដីចំនួន ៥ គ្រឿងត្រូវបានសាលាសង្កាត់ច្បារអំពៅទី២ ចាប់ឃាត់ទុកបន្ទាប់ពីដឹងថា រថយន្តខាងលើបានបំផ្លាញផ្លូវចាក់ក្រាលបេតុងថែមទាំងគំរបលូជាទ្រព្យសម្បតិរបស់រដ្ឋ។

យោងតាមប្រភពពីលោក ជូ ចាន់នី ជំនួយការសាលាសង្កាត់ច្បារអំពៅទី២បានឲ្យកម្ពុជាថ្មីដឹងនាព្រឹកថ្ងៃទី ១៥ ខែកញ្ញានេះថា រថយន្តដឹកដីទាំង៥គ្រឿងនេះបានបើកបរដឹកដីទៅចាក់ក្នុងដីឡូត៍មួយកន្លែងស្ថិតក្នុងភូមិដើមស្លែង១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញដោយបំផ្លាញផ្លូវចាក់ក្រាលបេតុងថែមទាំងគំរបលូទៀតផង។

លោកជំនួយការបានបន្តថា ការចាប់រថយន្តនេះគឺដើម្បីឲ្យម្ចាស់រថយន្តចេញថ្លៃខូចខាតផ្លូវ និងគំរបលូជាមួយផ្នែកជំនាញនៃការិយាល័យសាធារណការខណ្ឌច្បារអំពៅដោយរថយន្តទាំង៥គ្រឿងកំពុងរក្សាទុកនៅក្នុងវត្តច្បារអំពៅ។

តាមប្រសាសន៍លោក យុិន វិធី ចៅសង្កាត់ច្បារអំពៅទី២បានឲ្យដឹងថា ផ្លូវចាក់ក្រាលបេតុងនេះគឺសាលាខណ្ឌច្បារអំពៅបានស្ថាបនាសម្រាប់ឲ្យបងប្អូនប្រជាពលរដ្ឋលោកបានធ្វើដំណើរប៉ុន្តែបានរងការបំផ្លាញដោយរថយន្តដឹកដីដែលដឹកធ្ងន់ពេក។

ទោះជាយ៉ាងណាក៏រង់ចាំមើលផ្នែកជំនាញរបស់សាលាខណ្ឌជាអ្នកដោះស្រាយសំណងជាមួយម្ចាស់រថយន្តដឹកដីទាំង៥គ្រឿងនេះ៕

អត្ថបទ៖ នរា