ព័ត៌មានជាតិ

វិស័យ ៣ សំខាន់ ជាមុខព្រួញរុញកំណើនសេដ្ឋកិច្ចកម្ពុជាឲ្យស្ទុះឡើងនៅឆ្នាំ ២០២៤

បានផុស

១ year មុន

នៅ

ថ្ងៃចន្ទ ១៩ កុម្ភៈ ២០២៤

ដោយ

វិស័យ ៣ សំខាន់ នឹងក្លាយជាកម្លាំងចលកររុញកំណើនសេដ្ឋកិច្ចកម្ពុជាឲ្យស្ទុះងើបឡើងវិញនៅឆ្នាំ ២០២៤។

ថ្លែងនៅក្នុងវេទិកាសាធារណៈស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ ២០២៤ ដែលរៀបចំនៅព្រឹកមិញនេះលោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា តាមការការវិភាគពីស្ថាប័នអន្តរជាតិធំៗសេដ្ឋកិច្ចកម្ពុជាត្រូវបានរំពឹងទុកនឹងអាចហក់ឡើងក្នុងរង្វង់ខ្ទង់មិនក្រោម ៦ ភាគរយនៅឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ

កំណើនសេដ្ឋកិច្ចកម្ពុជានៅក្នុងឆ្នាំ ២០២៤ ត្រូវបានទ្រទ្រង់ដោយវិស័យ ៣ សំខាន់ មានវិស័យកម្មន្តសាល ទេសចរណ៍ និងកសិកម្ម។ នេះបើតាមលោក ផាន់ ផល្លា។

វិស័យឧស្សាហកម្មនឹងបន្តនិន្នាការកើនឡើងនៅក្នុងឆ្នាំ ២០២៤ ដោយសារការងើបឡើងវិញវិស័យកាត់ដេរ ស្របពេលដែលវិស័យកម្មន្តសាលមិនមែនកាត់ដេរនៅបន្តរក្សាបានកំណើនរឹងមាំ។

លោក ផាន់ ផល្លាបានលើកឡើងថា ដោយសារមានការកើនឡើងតម្រូវការជាសកលជាពិសេសបណ្ដាប្រទេសជាដៃគូពាណិជ្ជកម្មរបស់កម្ពុជា រួមមានសហរដ្ឋអាម៉េរិក និងសហភាពអឺរ៉ុប ទើបនាំឲ្យវិស័យកាត់ដេរមាននិន្នាការងើបឡើងវិញ ។

បើតាមមន្រ្តីក្រសួងសេដ្ឋកិច្ចរូបនេះ ការដាក់ចេញនូវ “យុទ្ធសាស្ត្រអភិវឌ្ឍន៍វិស័យកាត់ដេរ, ផលិតស្បែកជើង និងកាបូបកម្ពុជា ២០២២-២០២៧” បានជួយជំរុញបរិយាកាសវិនិយោគនិងការប្រកួតប្រជែងបន្ថែមទៀត។ បន្ថែមពីនេះការដាក់ឲ្យប្រើប្រាស់ “ច្បាប់ស្ដីពីវិនិយោគនៃព្រះរាជាណាចក្រកម្ពុជា” ក៏បានរួមចំណែកបង្កើនបរិយាកាសវិនិយោតឱ្យកាន់តែមានភាពទាក់ទាញនិងប្រសើរជាងមុនផងដែរ។

ជាមួយគ្នានេះ មន្រ្តីក្រសួងសេដ្ឋកិច្ចរូបនេះក៏បានលើកពីវិស័យទេសចរណ៍ និងសេវាកម្ម ដែលជាវិស័យសំខាន់មួយទៀតដែលនឹងជួយរុញកំណើនសេដ្ឋកិច្ចកម្ពុជាឲ្យហក់ឡើងក្រោយវិបត្តិជំងឺកូវីដ។

វិស័យទេសចរណ៍ និងសេវាកម្ម នឹងបន្តនិន្នាការល្អក្នុងឆ្នាំ ២០២៤ ដោយសារការជំរុញសកម្មភាពសេដ្ឋកិច្ចក្នុងស្រុក និងការងើបឡើងវិញនៃកំណើនភ្ញៀវទេសចរអន្តរជាតិ ស្របពេលដែលភ្ញៀវទេសចរជាតិក៍រំពឹងនឹងបន្តកើនឡើង។

ដោយឡែកវិស័យកសិកម្មក៏នឹងរួមចំណែកជួយរុញកំណើនសេដ្ឋកិច្ចកម្ពុជានៅឆ្នាំ ២០២៤។ នេះបើតាមលោក ផាន់ ផល្លា។

វិស័យកសិកម្ម រំពឹងថានឹងបន្តសម្រេចបានកំណើនល្អក្នុងរង្វង់ ១,១% ក្នុងឆ្នាំ ២០២៤ ធៀបនឹង ០,៩% ក្នុងឆ្នាំ ២០២៣។

មន្រ្តីក្រសួងសេដ្ឋកិច្ចរូបនេះបានលើកឡើងកំណើនផលិតកម្មកសិកម្ម ជំរុញដោយសារកម្ពុជាបានចុះកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសផ្សេងៗរួមមាន “កិច្ចព្រមព្រៀងពាណិជ្ជកម្មសេរីកម្ពុជា-ចិន”, «កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ” “កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ជាដើម គួបផ្សំនឹងការបង្កើនការវិនិយោគរបស់រាជរដ្ឋាភិបាលតាមរយៈការបន្តផ្ដល់ការលើកទឹកចិត្តផ្នែកពន្ធសម្រាប់ការនាំចូលវត្ថុធាតុដើមកសិកម្ម និងការផ្តល់ហិរញ្ញប្បទានក្នុងការជំរុញផលិតកម្មក្នុងស្រុក៕

Related Topics:លោក ផាន់ ផល្លា