ព័ត៌មានអន្ដរជាតិ

កូរ៉េខាងត្បូង ចូលរួមបង្ហាញសព្វាវុធទំនើបៗក្នុងលំហាត់សមយុទ្ធ “ពស់វែកមាស” នៅថៃ

បានផុស

២ years មុន

នៅ

ថ្ងៃសៅរ៍ ២ មីនា ២០២៤

ដោយ

លំហាត់សមយុទ្ធយោធាទាំងលើគោក ជើងទឹក និងជើងអាកាសនៃសមយុទ្ធពស់វែកមាសឆ្នាំ ២០២៤ នៅប្រទេសថៃបានធ្វើឡើងនៅមូលដ្ឋានអនុវត្តហ្វឹកហាត់ទ័ពជើងទឹកលេខ ១៥ ក្នុងតំបន់ឆ្នេរ Hat Yao ស្រុក Sattahip ខេត្ត Chonburi ប្រទេសថៃ ខណៈអាមេរិក និងកូរ៉េខាងត្បូងក៏ចូលរួមផងដែរ ។ នេះបើតាមការចុះផ្សាយរបស់សារព័ត៌មាន Khaosod ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានដដែលបានឲ្យដឹងថា ការអនុវត្តសមយុទ្ធខាងលើដែលធ្វើឡើងកាលពីម៉ោង ១០ ព្រឹកថ្ងៃសុក្រ ទី១ ខែមីនា ក្នុងនោះគេឃើញមានអាវុធយោធុបករណ៍ដូចជា នាវាចម្បាំងអាមេរិក Somerset, យន្តហោះចម្បាំង F-16 , នាវាចម្បាំង HTMS Surin និង Mannai និងយន្តហោះល្បាត T-337 ឬ Cessa O-2 របស់ថៃ ព្រមទាំងនាវាចម្បាំង ROKS No Jeok Bong (LSTII-689) និងយាន KAVV ដែលអាចបើកបានទាំងលើគោក និងលើផ្ទៃទឹករបស់កូរ៉េ។

ក្នុងអំឡុងពេលប្រតិបត្តិការសមយុទ្ធនោះ គេឃើញមានលំហាត់ទាំងជើងគោក ជើងទឹក និងអាកាស ដោយមាននាវាចម្បាំង និងយន្តហោះចម្បាំង សមវាយឆ្មក់មួយប្រាវៗលើតំបន់ឆ្នេរ ខណៈពេលដែលក្រុមជំនួយក៏អនុវត្តការគាំទ្រការវាយប្រហារនោះ រហូតគ្រប់គ្រងតំបន់ឆ្នេរបានទាំងស្រុង ។

ប្រតិបត្តិការខាងលើនេះមានការចូលរួមដោយ លោកឧត្តមនាវីឯក Adung Phaniam មេបញ្ជាការកងទ័ពជើងទឹកថៃ អនុឧត្តមនាវីឯក Christopher D. Stone មេបញ្ជាការក្រុមទ័ពក្រៅប្រទេសទី៧ នៃកងយុទ្ធពលទី៧៦ និងមេបញ្ជាការទ័ពជើងទឹកសហរដ្ឋអាមេរិក ក៏ដូចជា អនុឧត្តមនាវីឯក Cho Choong Ho មេបញ្ជាការកងនាវាតូចទី៥ នៃសាធារណរដ្ឋកូរ៉េខាងត្បូង ។

គួររំឭកថា សមយុទ្ធពស់វែកមាសឆ្នាំ ២០២៤ នៅប្រទេសថៃ ជាសកម្មភាពលំហាត់សមយុទ្ធយោធាធំមួយក្នុងតំបន់អាស៊ីប៉ាស៊ីហ្វិក ដោយមានការចូលរួមពីមន្រ្តីយោធាចំនួន ៣០ ប្រទេស ក្នុងឋានៈអ្នកចូលរួម និងអង្កេតការណ៍ ហើយសមយុទ្ធធ្វើឡើងពីថ្ងៃទី២៦ ខែកុម្ភៈដល់ថ្ងៃទី៨ ខែមីនា ២០២៤ នេះ ៕