ស្លាប់​បុរស ២ នាក់​ នៅ តៃវ៉ាន់ ក្រោយ​ញ៉ាំ​អាហារ​បួស​របស់ម៉ាឡេស៊ី

អាជ្ញាធរតៃវ៉ាន់បាននិយាយថា បុរសពីរនាក់បានស្លាប់ដោយសារតែគេសង្ស័យថាពុលអាហារ បន្ទាប់ពីបានញ៉ាំ char kway teow ដែលជាមុខម្ហូបគុយទាវឆានៅភោជនីយដ្ឋានអាហារបួសម៉ាឡេស៊ី ក្នុងទីក្រុងតៃប៉ិ​។

សារព័ត៌មាន The Straits Times បានរាយការណ៍ថា មនុស្សប្រាំបីនាក់ដែលបានទទួលទានអាហារនៅភោជនីយដ្ឋាន Polam Kopitiam ក្នុងហាង Far Eastern Department Store ក្នុងស្រុក Xinyi កាលពីថ្ងៃទី ១៩, ២១ និង ២២ខែមីនា បានបង្ហាញរោគសញ្ញាដូចជាក្អួត និងរាគរូស ហើយត្រូវបានគេបញ្ជូនទៅមន្ទីរពេទ្យក្បែរនោះភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមពួកគេ មានបុរសអាយុ ៣៩ ឆ្នាំ និងបុរសអាយុ ៦៦ ឆ្នាំម្នាក់ ត្រូវបានបញ្ជាក់ថាបានស្លាប់ ហើយយ៉ាងហោចណាស់ ៤ នាក់ផ្សេងទៀតស្ថិតក្នុងស្ថានភាពធ្ងន់ធ្ងរនូវឡើយ។

លើសពីនេះទៀតដែរ អាជ្ញាធរ​សុខាភិបាល​តៃប៉ិ​បាន​ធ្វើ​តេស្ត​គំរូ​អាហារ​នៅ​ភោជនីយដ្ឋាន ប៉ុន្តែ​មិន​បាន​រក​ឃើញ​បាក់តេរី​ណា​ដែល​ទាក់ទង​នឹង​ការ​ពុល​អាហារ​ទេ។ សំណាកអាហារផ្សេងទៀតដូចជា ស្ពៃក្តោប មី និងទឹកស៊ីអ៊ីវ ដែលចាត់ទុកថាមានហានិភ័យខ្ពស់នៃការចម្លងរោគ ក៏ត្រូវបានគេយកផងដែរនៅថ្ងៃទី ២៦ ខែមីនា ប៉ុន្តែលទ្ធផលត្រូវបានរំពឹងទុកក្នុងរយៈពេលពីរសប្តាហ៍ទៀតឯណោះ។

សូមជម្រាបជូនថា Polam Kopitiam គឺជាភោជនីយដ្ឋានអាហារបួសបែបម៉ាឡេស៊ីដ៏ពេញនិយមនៅតៃវ៉ាន់។ វាមានសាខាចំនួន ៥ នៅតៃវ៉ាន់ ដែលមានជំនាញក្នុងការបម្រើមុខម្ហូបដូចជាគុយទាវឆា និងការីមាន់។ បច្ចុប្បន្ននេះ ហាងទាំងអស់នៃសង្វាក់ភោជនីយដ្ឋានបានផ្អាកប្រតិបត្តិការ ដើម្បីបម្រើការស៊ើបអង្កេតដោយប៉ូលិសក្នុងតំបន់៕

អត្ថបទ៖ សាង ស្រីល័ក្ខ

ចុចអាន៖បុរស អាមេរិក ម្នាក់ ដើរកាន់សាកសពជើងមនុស្ស និងហែកទំពាដូចចំណី