អង់គ្លេសប្រកាសដោយចំហ បើកដៃឲ្យអ៊ុយក្រែន ប្រើអាវុធខ្លួន បាញ់ប្រហារឧបទ្វីប គ្រីមៀ

មិនទាន់បានមួយខែផង បន្ទាប់ពីរដ្ឋមន្ត្រីការបរទេសអង់គ្លេស Lord Cameron បើកដៃឲ្យអ៊ុយក្រែន ប្រើអាវុធរបស់ខ្លួន យកទៅវាយប្រហារគោលដៅលើទឹកដីរុស្ស៊ីនោះ ស្រាប់តែពេលនេះ រដ្ឋមន្ត្រីការពារជាតិក្នុងទីក្រុងឡុងដ៍ ក៏ចេញមុខប្រកាសដោយចំហដែរថា កងកម្លាំងទីក្រុងកៀវ​ អាចប្រើសព្វាវុធដែលផ្គត់ផ្គង់ដោយអង់គ្លេស បាញ់ប្រហារនៅឧបទ្វីបគ្រីមៀ របស់រុស្ស៊ីបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកកាសែតក្នុងសន្និសីទកងទ័ពជើងទឹកនិងត្រូវបានដកស្រង់សម្តីដោយសារព័ត៌មាន RT កាលពីថ្ងៃអង្គារទី១៤ខែឧសភា លោក Grant Shapps បញ្ជាក់ថា តំបន់គ្រីមៀ ត្រូវរុស្ស៊ីកាត់យកក្រោយការធ្វើប្រជាមតិឆ្នាំ២០១៤ ប៉ុន្តែទីក្រុងឡុងដ៍នៅតែចាត់ទុកវាជាផ្នែកនៃដែនដីអ៊ុយក្រែន ដូច្នេះកងកម្លាំងរបស់លោក ហ្សេលេនស្គី អាចប្រើប្រាស់សព្វាវុធរបស់អង់គ្លេស វាយប្រហារទីនោះបាន។

លោក Shapps អះអាងថា ចក្រភពអង់គ្លេស មិនអាចទទួលយកបានឡើយ បើរុស្ស៊ីឈ្នះសង្គ្រាម ហើយលោកថែមអំពាវនាវឲ្យបណ្តាប្រទេសជាមិត្ត សម្រុកបញ្ជូនសព្វាវុធ ទៅកាន់ទីក្រុងកៀវ ឲ្យកាន់តែខ្លាំងទៀតផង។ ទោះបែបនេះក្តី នៅពេលសាកសួរថាតើ អង់គ្លេសនឹងបញ្ជូនអាវុធអ្វីទៀតទៅឲ្យអ៊ុយក្រែន, រដ្ឋមន្ត្រីខាងលើ មិនបានផ្តល់ព័ត៌មានលម្អិតនោះទេ។

សូមរម្លឹកជាថ្មីទៅ២សប្តាហ៍មុនបន្តិច, កាលនោះលោក Cameron បញ្ជាក់ថា អ៊ុយក្រែន មានសិទ្ធចង់ប្រើប្រាស់អាវុធរបស់អង់គ្លេសតាមរបៀបណាក៏បាន ចង់វាយប្រហារគោលដៅលើទឹកដីរុស្ស៊ីក៏បាន។

យ៉ាងណា ទីក្រុងមូស្គូ ធ្លាប់ព្រមានរួចមកហើយថា បើមានការវាយប្រហារណាមួយមែន ខ្លួនអាចសងសឹក ដោយកម្ទេចគោលដៅយោធាអង់គ្លេសនៅក្នុងប្រទេសអ៊ុយក្រែន ឬលើសពីនេះទៀត។

ពាក់ព័ន្ធការលើកឡើងរបស់លោក Cameron ទៀតសោត រុស្ស៊ី​បាន​ថ្កោលទោស ហើយចាត់ទុកវាជា​សេចក្តីថ្លែងការណ៍​ដ៏​គ្រោះថ្នាក់​​ ខណៈអ្នកនាំពាក្យវិមានក្រឹមឡាំង លោក Dmitry Peskov ព្រមានថា “ពាក្យសម្តីបែបនេះ ជាការជំរុញដោយផ្ទាល់ ឲ្យភាពតានតឹងជុំវិញជម្លោះអ៊ុយក្រែន ឈានដល់កម្រិតថ្មី ដែលនឹងអាចគំរាមកំហែងដល់សន្តិសុខអឺរ៉ុបថែមទៀតផង”។

ចំណែកអ្នកនាំពាក្យក្រសួងការបរទេសរុស្ស៊ីលោកស្រី Maria Zakharova ក៏លើកឡើងដែរថា សម្តីរបស់លោក Cameron គឺស្មើនឹងការទទួលស្គាល់ថា លោកខាងលិចពិតជាជាប់ពាក់ព័ន្ធនៅក្នុង សង្រ្គាមកូនកាត់ ប្រឆាំងទីក្រុងមូស្គូមែន។

សូមជម្រាបថា ចាប់តាំងពីរុស្ស៊ីបើកការលុកលុយពេញទំហឹងនៅក្នុងខែកុម្ភៈឆ្នាំ២០២២មក ចក្រភពអង់គ្លេស បានផ្តល់ជំនួយយោធារាប់លានដុល្លារឲ្យអ៊ុយក្រែនរួចទៅហើយ រួមបញ្ចូលទាំងរថក្រោះ មីស៊ីល និងប្រព័ន្ធការពារដែនអាកាសជាដើម ហើយឆ្នាំមុន អង់គ្លេសបញ្ជាក់ថា ខ្លួនបានចាប់ផ្តើមផ្គត់ផ្គង់មីស៊ីលរយៈចម្ងាយឆ្ងាយ Storm Shadow ដែលបាញ់បានជាង២៥០គីឡូម៉ែត្រទៀតផង៕

អត្ថបទ៖ សុខ សុវណ្ណ

ចុចអាន៖​ អង់គ្លេស បើកដៃឲ្យអ៊ុយក្រែន ប្រើអាវុធរបស់ខ្លួន វាយប្រហារក្នុងទឹកដីរុស្ស៊ី