ព័ត៌មានជាតិ

រដ្ឋមន្ត្រីសុខាភិបាល ៖ តម្រូវការឈាមនៅកម្ពុជា កើនដល់ ៤០០ ប្លោក ក្នុង ១ ថ្ងៃ

បានផុស

២ years មុន

នៅ

ថ្ងៃសុក្រ ១៤ មិថុនា ២០២៤

ដោយ

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអះអាងថា បច្ចុប្បន្ន ក្នុង ១ ថ្ងៃ កម្ពុជា មានតម្រូវការឈាមសម្រាប់ជួយសង្គ្រោះអាយុជីវិតដល់អ្នកជំងឺ និងជនរងគ្រោះ ប្រមាណ ៤០០ ប្លោក ដែលទាមទារឱ្យមានការចូលរួមបរិច្ចាគឈាមដោយស្ម័គ្រចិត្តពីភាគីពាក់ព័ន្ធ និងសប្បុរសជនឱ្យបានកាន់តែច្រើនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងទិវាពិភពលោក នៃអ្នកបរិច្ចាគឈាម ក្រោមប្រធានបទ«ខួប ២០ ឆ្នាំ នៃការបរិច្ចាគឈាម សូមអរគុណសប្បុរសជនបរិច្ចាគឈាម» នៅថ្ងៃទី ១៤ ខែមិថុនា ឆ្នាំ ២០២៤ នាមជ្ឈមណ្ឌលជាតិផ្តល់ឈាម លោករដ្ឋមន្ត្រី បានបន្តថា ឆ្នាំ ២០២៣ កន្លងទៅ មជ្ឈមណ្ឌលជាតិផ្តល់ឈាម បានទទួលអំណោយឈាមចំនួន ១៤៣ ២៤៣ ប្លោក កើនឡើង ២៥% ច្រើនជាងឆ្នាំ ២០២២។ ដូចនេះ ក្នុង ១ ថ្ងៃ ត្រូវការឈាមប្រមាណ ៤០០ ប្លោក ក្នុងនោះ នៅរាជធានីភ្នំពេញ ត្រូវការប្រមាណ ៦៥% ស្មើនឹង ២៦០ ប្លោក និងតាមបណ្ដាខេត្តត្រូវការ ១៤០ ប្លោក។

លោករដ្ឋមន្ត្រី បានណែនាំដល់មជ្ឈមណ្ឌលជាតិផ្តល់ឈាម ត្រូវរៀបចំបែងចែកក្រុមការងារផ្តល់ឈាម ដើម្បីចុះទៅប្រមូលឈាមតាមគោលដៅនីមួយៗ ក្នុងរាជធានីភ្នំពេញ ក៏ដូចជាតាមបណ្ដាខេត្តនៅតាមសាកលវិទ្យាល័យ ស្ថាប័នរដ្ឋ និងវិស័យឯកជននានា សំដៅធ្វើយ៉ាងណាប្រមូលឈាមឱ្យបានច្រើន ដើម្បីជួយដល់ជនរងគ្រោះកំពុងត្រូវការឈាមជាចាំបាច់ ពិសេសឱ្យប្រទេសកម្ពុជាទទួលបានឯករាជ្យដោយទទួលបានការផ្តល់ឈាមដោយស្ម័គ្រចិត្តច្រើនដូចបណ្ដាប្រទេសជិតខាង។

លោករដ្ឋមន្ត្រី បានបន្តទៀតថា ការផ្តល់ឈាមនេះ មិនអាចកាត់ផ្ដាច់បានពីវិស័យឯកជន សប្បុរសជន តួអង្គសប្បុរសធម៌ និងសហភាពសហព័ន្ធយុវជនកម្ពុជា(ស.ស.យ.ក) បាននោះទេ ព្រោះវាជាចលករដ៏សំខាន់ក្នុងការធ្វើឱ្យសម្រេចបានក្នុងការទទួលអំណោយឈាមបានច្រើន។

លោករដ្ឋមន្ត្រី បានណែនាំដល់និស្សិតថា «ធ្វើជាមនុស្សល្អ ជាដំបូងត្រូវធ្វើខ្លួនយើងក្លាយជាមនុស្សល្អជាមុនសិន បន្ទាប់មកទៀត បើធ្វើល្អខ្លួនយើងហើយអត់បានគិតជួយអ្នកផងដទៃជុំវិញខ្លួន និងសង្គមទេ ក៏មិនទាន់ក្លាយជាមនុស្សល្អដែរ។ ការផ្តល់ឈាមនេះ ជួយដល់ក្រុមគ្រួសារ និងអ្នកជុំវិញនិងសង្គម ព្រមទាំងជួយខ្លួនយើងផ្ទាល់ដែរ។ អ្នកដែលចូលរួមផ្តល់ឈាម គឺជាការលះបង់មួយដ៏ធំ និងជាវីរបុរស។ ការផ្តល់ឈាម ជាសកម្មភាពសាមគ្គី ជាការស្រលាញ់ និងជាការផ្តល់ជីវិត ព្រោះថាប្រសិនបើមិនមានឈាមទេ អ្នកជំងឺអាចប្រឈមនឹងគ្រោះថ្នាក់ដល់អាយុជីវិត»។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា មជ្ឈមណ្ឌលជាតិ បានកត់ត្រាទុកនូវព្រឹត្តិការណ៍ដ៏សំខាន់មួយនេះ និងសូមថ្លៃងអំណរគុណដល់ការគាំទ្រទាំងឡាយ ដើម្បីបុព្វហេតុមនុស្សធម៌ ព្រមទាំងសូមអំពាវនាវឱ្យមានការគាំទ្របន្តទៀតតាមគ្រប់រូបភាពក្នុងយុទ្ធនាការផ្សេងៗ នាពេលខាងមុខ។

លោកវេជ្ជបណ្ឌិត បានបន្តថា «សូមចងចាំថា កិច្ចបរិច្ចាគឈាម មិនប៉ះពាល់ដល់សុខភាពទេ ហើយឈាមគឺជាឱសថដ៏ស័ក្ដិសិទ្ធិមួយក្នុងវិស័យវេជ្ជសាស្ត្រទំនើបដែលគ្មានរោងចក្រណាអាចផលិតបានទេ ហើយមានប្រភពតែមួយគត់ គឺពីមនុស្ស។ សូមកុំរង់ចាំដល់វេលាមួយនៅពេលមួយដែលយើងចង់ធ្វើអំណោយឈាមបែរជាហួសពេល»៕

អត្ថបទ ៖ សំអឿន